ပထမအကြိမ် မြန်မာနိုင်ငံဘောလုံးအဖွဲ့ချုပ်ညီလာခံ (2015 MFF Congress) ကို စက်တင်ဘာလ (၂၆) ရက်နေ့၊ နံနက် (၁၀) နာရီ တွင် ရန်ကုန်မြို့၊ Novotel Yangon Max ၊ Grand Ball Room ၌ ကျင်းပရာ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော် နှင့် MNL ကလပ်အသင်းပိုင်ရှင်များ၊ MNLကလပ်အသင်းများမှ တာဝန်ရှိသူများ၊ တိုင်းဒေသကြီးနှင့် ပြည်နယ်များမှ ကိုယ်စားလှယ်များ၊ ဌာနဆိုင်ရာများမှ ကိုယ်စားလှယ်များ၊ MFF မှ ဌာနတာဝန်ခံများ၊ စာနယ်ဇင်းမီဒီယာများနှင့် အခြားဖိတ်ကြားထားသည့် ဧည့်သည်တော်များ စုံညီစွာတက်ရောက် ခဲ့ကြသည်။

ရှေးဦးစွာ MFF ဥက္ကဋ္ဌ ဦးဇော်ဇော် မှ ညီလာခံ အဖွင့်အမှာ စကားပြောကြားခဲ့သည်။ ဦးဇော်ဇော် က ယခု ၂၀၁၅ MFF ညီလာခံကို လေးနှစ်တစ်ကြိမ် ကျင်းပသွားမည် ဖြစ်ပြီး အရင်က MFF ဖွဲ့စည်းပုံမှာ ဖီဖာနှင့် အာရှ အဆင့်မရှိခဲ့သော်လည်း ယခုညီလာခံကို လွတ်လပ်မျှတစွာ ခေါ်ယူကျင်းပနိုင် ခဲ့သဖြင့် နောက်ပိုင်းတွင် မြန်မာနိုင်ငံဘောလုံးအဖွဲ့ချုပ်ဖွဲ့စည်းပုံမှာ နိုင်ငံတကာ အဆင့်သို့ တက်လှမ်း  နိုင်တော့ မည် ဖြစ်ကြောင်း၊ MFF ဖွဲ့စည်းရာတွင် ဘောလုံးလောက ဖွံ့ဖြိုးတိုးတက်စေ ရန် စိတ်ရောလူရော ကြိုးပမ်းပြီး စိတ်စေတနာရှိသည့် သူများ ပါဝင်ရ မည်ဖြစ်ကြောင်း၊ မြန်မာနိုင်ငံ၏ ဘောလုံးအဆင့်အတန်း တိုးတက်မြင့်မားရန်အရေးကြီးဆုံးမှာ အခြေခံအဆောက် အဦ နှင့် ဘောလုံးလော ကတွင် ပါဝင်လုပ်ဆောင်နေသူများ၏ စွမ်းဆောင် ရည် ပင်ဖြစ်ကြောင်း ၊ အခြေခံအဆောက်အဦ ပိုင်းအတွက် နိုင်ငံတော် ပိုင်းမှ ဆောင်ရွက်ပေးရန် တောင်းဆိုပါကြောင်းနှင့် မိမိတို့ အပိုင်းမှ ဘောလုံးလောကဖွံ့ဖြိုးတိုးတက်ရန် အခြားအပိုင်းများတွင် အစွမ်းကုန် ကြိုးပမ်းဆောင်ရွက်သွားမည် ဖြစ်ကြောင်း ထည့်သွင်း ပြောကြားခဲ့သည်။

ယင်းနောက် MFF ညီလာခံမှ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ရွေးကောက်ခဲ့ရာ လက်ရှိဥက္ကဋ္ဌ ဦးဇော်ဇော် တစ်ဦးသာ ဥက္ကဋ္ဌလောင်းစာရင်း တင်သွင်းခဲ့သဖြင့် လာမည့် MFF ဥက္ကဋ္ဌ ရာထူးထမ်းဆောင်ရန် လာမည့် လေးနှစ်သက်တမ်း အတွက် လက်ရှိဥက္ကဋ္ဌ ဦးဇော်ဇော် ရွေးကောက် တင်မြှောက်ခံခဲ့ရသည်။ ယင်းနောက် ဒုတိယဥက္ကဋ္ဌများအဖြစ် ရတနာပုံအသင်း ပိုင်ရှင် ဒေါက်တာ စိုင်းဆမ်ထွန်းနှင့် ရန်ကုန်ယူနိုက်တက် အသင်းဥက္ကဋ္ဌ ဦးပြည့်ဖြိုးတေဇ တို့ အား ဦးဇော်ဇော်မှ အဆိုပြုတင်ပြရာ တက်ရောက်လာ သည့် တိုင်းဒေသကြီးနှင့် ပြည်နယ်များမှ ကိုယ်စားလှယ် စုစုပေါင်း ၄၁ ဦးအနက် ၃၉ ဦးထောက်ခံမဲဖြင့် ရွေးချယ်ခဲ့ကြသည်။

ထို့နောက် မြန်မာနိုင်ငံဘောလုံးအဖွဲ့ချုပ် အမှုဆောင်ကော်မတီဝင်များအား တက်ရောက်လာသည့် ကိုယ်စားလှယ်များ၏ ဆန္ဒမဲ အများစုဖြင့် ဆက်လက်ရွေးကောက်တင်မြှောက်ခဲ့ကြသည်။ ယင်းအပြီးတွင် ဥက္ကဋ္ဌ ဦးဇော်ဇော် မှ မြန်မာနိုင်ငံဘောလုံးအဖွဲချုပ် နာယကအဖြစ် ယခင် နာယကဟောင်း ဦးအောင်ကိုဝင်းအား အဆိုပြုခဲ့ရာ တက်ရောက်လာသည့် ကိုယ်စားလှယ် (၄၁) ဦးစလုံး ကန့်ကွက်သူမရှိ ဆန္ဒမဲပေးပြီး ဦးအောင်ကိုဝင်းအား မြန်မာနိုင်ငံဘောလုံးအဖွဲ့ချုပ် နာယက အဖြစ် ရွေးချယ်ခဲ့ကြသည်။ ယင်းနောက် ကိုယ်စားလှယ်များနှင့် ကွန်ဂရက်စ် အစည်းအဝေး တက်ရောက်သူအားလုံးကို နေ့လည်စာဖြင့် ဧည့်ခံပြီးနောက် မြန်မာ့ ဘောလုံး သမိုင်းတွင် မှတ်တမ်းတင်ရမည့် ပထမအကြိမ် ညီလာခံ အခမ်းအနားအတွက် သတင်းစာ ရှင်းလင်းပွဲ အခမ်းအနားကို ဆက်လက်ကျင်းပခဲ့သည်။

၂၀၁၅-၂၀၁၉ လေးနှစ်တာ ကာလအတွက် ရွေးချယ်တင်မြှောက်ခံရ သည့် မြန်မာနိုင်ငံ ဘောလုံး အဖွဲ့ချုပ် ဥက္ကဋ္ဌ၊ ဒုတိယ ဥက္ကဋ္ဌများနှင့် အမှုဆောင် အဖွဲ့ဝင်များစာရင်း

နာယက – ဦးအောင်ကိုဝင်း
ဥက္ကဋ္ဌ – ဦးဇော်ဇော်
ဒုတိယဥက္ကဋ္ဌများ – ဒေါက်တာစိုင်းဆမ်ထွန်း၊ ဦးပြည့်ဖြိုးတေဇ

မြန်မာနိုင်ငံဘောလုံးအဖွဲ့ချုပ် အမှုဆောင်ကော်မတီဝင်များ

————————————————–

၁။ ဦးစိန်ဝင်းကြီး (အထက်မြန်မာပြည်ဘောလုံးအဖွဲ့ချုပ်များ ကိုယ်စားလှယ်)
၂။ ဦးခင်မောင်သန်း (အထက်မြန်မာပြည်ဘောလုံးအဖွဲ့ချုပ်များ ကိုယ်စားလှယ်)
၃။ ဦးကျော်မင်းအောင် (အောက်မြန်မာပြည်ဘောလုံးအဖွဲ့ချုပ်များ ကိုယ်စားလှယ်)
၄။ ဦးဇော်ဝင်းကြီး (အောက်မြန်မာပြည်ဘောလုံးအဖွဲ့ချုပ်များ ကိုယ်စားလှယ်)
၅။ ဦးဝင်းချို (ဒိုင်ကော်မတီ)
၆။ ဦးရဲညွန့် (ဘောလုံးသမားကော်မတီ)
၇။ ဦးကြည်မင်းသိန်း (ဖူဆယ်လ်နှင့် သဲသောင်ပြင်ကော်မတီ)
၈။ ဒေါ်မြတ်မြတ်ဦး (အမျိုးသမီးဘောလုံးကော်မတီ)
၉။ ဦးဉာဏ်ဝင်း (နည်းပြဆရာများကော်မတီ)
၁၀။ ဦးမိုးဆန်းအောင် (ကလပ်အသင်းများကိုယ်စားလှယ်)
၁၁။ ဦးလှဋ္ဌေး (ကလပ်အသင်းများကိုယ်စားလှယ်)
၁၂။ ဦးမင်းလှိုင် (ကလပ်အသင်းများကိုယ်စားလှယ်)
၁၃။ ဦးကျော်ဆန်း (အားကစားဝန်ကြီးဌာန ကိုယ်စားလှယ်)
၁၄။ ဦးမျိုးသိန်း (ပညာရေးဝန်ကြီးဌာန ကိုယ်စားလှယ်)
၁၅။ ဦးအေးကိုကို (ကျန်းမာရေးဝန်ကြီးဌာန ကိုယ်စားလှယ်)