မြန်မာနိုင်ငံ ဘောလုံး အဖွဲွ့ချုပ်မှကြီးမှူး ကျင်းပမည့် MFF U13 Girls 100 PLUS Super Cup 2015 ပြိုင်ပွဲအား အောက်တိုဘာ ၂၄ ရက်နေ့မှ စတင်ကာ နိုဝင်ဘာ (၁)ရက်နေ့အထိ ပဒုမ္မာကွင်းနှင့် စလင်းကွင်းတို့တွင် ကျင်းပသွားမည် ဖြစ်သည်။ အဆိုပါ ပြိုင်ပွဲတွင် တိုင်းဒေသကြီးနှင့် ပြည်နယ်များမှ အခြေခံပညာ အဆင့် အသင်းပေါင်း (၁၈)သင်း  ပါဝင်ယှဉ်ပြိုင် ကြမည်ဖြစ်ပြီး ကစားသမားများမှာ အသက်(၁၃)နှစ်အောက် ကျောင်းသူများ ဖြစ်ကြသည်။ မြန်မာနိုင်ငံ ဘောလုံးအဖွဲ့ချုပ် အနေဖြင့် အမျိုးသမီး ဘောလုံး လောကအတွက် အထောက်အကူပြု စေမည့် မျိုးဆက်သစ် လူငယ် ကစားသမားများ ပေါ်ထွက်လာစေရန် အထက်ပါ ပြိုင်ပွဲအား ကျင်းပခြင်း ဖြစ်ပြီး ပညာရေး ဝန်ကြီးဌာနနှင့် ပေါင်းစပ်၍ ပြိုင်ပွဲအား အကောင်အထည်ဖော်နိုင်ခဲ့ခြင်း ဖြစ်သည်။

ပြိုင်ပွဲအား မြန်မာနိုင်ငံ ဘောလုံးအဖွဲ့ချုပ်၏ Partner ဖြစ်သည့် 100 PLUS မှ အဓိက စပွန်ဆာအဖြစ် ပံ့ပိုးကူညီခြင်းဖြစ်ပြီး ပြိုင်ပွဲအမည်ကိုလည်း MFF U13 Girls 100 PLUS Super Cup 2015 ပြိုင်ပွဲဟု သတ်မှတ်ထားသည်။

” ကျွန်တော်တို့ F&N Company အနေနဲ့ မြန်မာနိုင်ငံ ဘောလုံးအဖွဲ့ချုပ်နဲ့ အတူလက်တွဲပြီး မြန်မာ့လက်ရွေးစင် အသင်းကြီး၊ မြန်မာ ယူ၁၉ အသင်းနဲ့ မြန်မာနိုင်ငံ ဘောလုံး အဖွဲ့ချုပ်မှ ပြိုင်ပွဲများ၊ အစီအစဉ်များကို အစဉ်အဆက် ကူညီပံ့ပိုးပေးခဲ့ပါတယ်။ MFF လမ်းညွှန်မှုနဲ့အတူ မျိုးဆက်သစ် အမျိုးသမီး ကစားသမားကောင်းများ ထွက်ပေါ်လာရေးအတွက် တစ်ထောင့်တစ်နေရာမှ ပါဝင်ခွင့်ရလို့ အလွန်ဝမ်းသာရပါတယ်။ နှစ်စဉ် ကျင်းပလျက်ရှိတဲ့ 100 PLUS SUPER CUP ပြိုင်ပွဲကို ယခုနှစ်မှာ MFF U13 Girls 100 PLUS Super Cup 2015 ပြိုင်ပွဲ အနေနဲ့ အသက်သွင်းလိုက်ရခြင်းဟာ အနာဂတ် အမျိုးသမီး ကစားသမားကောင်းများ ပေါ်ထွက်လာရေးအတွက် အဓိက ကျပါတယ်။” ဟု 100 PLUS ၏ F&N Company မှ ဈေးကွက်တာဝန်ခံ Mr.Prapas Rattanapas ကဆိုသည်။

မြန်မာနိုင်ငံ ဘောလုံး အဖွဲ့ချုပ် အနေဖြင့် ပညာရေးဝန်ကြီးဌာန၊ အခြေခံပညာ ဦးစီးဌာနနှင့် ပူးပေါင်း၍ ကျောင်းသား လူငယ်များ ဘောလုံး အားကစားကို လေ့လာလိုက်စား စေရန်၊ ထူးချွန်လူငယ်များ ပေါ်ထွက်လာစေရန် နှစ်စဉ် အမျိုးသား အမျိုးသမီး လူငယ်ပြိုင်ပွဲများကို ပူးပေါင်းကျင်းပလျက်ရှိသည်။

” မြန်မာနိုင်ငံ ဘောလုံး အဖွဲ့ချုပ် အနေနဲ့ အမျိုးသမီး ဘောလုံး လောကဖွံ့ဖြိုးရေး အတွက် ကမ္ဘာ့ဘောလုံး အဖွဲ့ချုပ်(ဖီဖာ)ရဲ့ လမ်းညွန်ချက်များအတိုင်း ဆောင်ရွက်လျက်ရှိသလို Women Football Development Plan တွေလည်း (၄)နှစ်တာ ကာလအတွက် ရေးဆွဲထားရပါတယ်။ စီမံချက်တွေအတိုင်း ဆောင်ရွက်ထားတာတွေကိုလည်း ဖီဖာကို Report ပြန်ပို့ရတာလည်း ရှိပါတယ်။ အခုလို တိုင်းဒေသကြီးနဲ့ပြည်နယ် အသီးသီးကို ကိုယ်စားပြုတဲ့ အသင်းတွေကနေ အနာဂတ် အမျိုးသမီး ဘောလုံးလောကအတွက် ကစားသမားကောင်းတွေ ပေါ်ထွက်လာမယ်လို့ ယုံကြည်ပါတယ်။” MFF အထွေထွေ အတွင်းရေးမှူး ဦးတင်အောင်ကဆိုသည်။

MFF U13 Girls 100 PLUS Super Cup 2015 ပြိုင်ပွဲအတွက် ပွဲစဉ်ဇယား ရေးဆွဲခြင်းနှင့် အသင်းမန်နေဂျာများ အစည်းအဝေးကို ယနေ့မွန်းလွဲ(၁း၀၀)နာရီက YTC Stadium တွင်ကျင်းပခဲ့ပြီး MFF အထွေထွေ အတွင်းရေးမှူးနှင့် တာဝန်ရှိသူများ၊ 100 PLUS မှ တာဝန်ရှိသူများ၊ တိုင်းဒေသကြီးနှင့်ပြည်နယ်များမှ ပြိုင်ပွဲဝင် အသင်းများ တက်ရောက်ခဲ့ကြသည်။ ပြိုင်ပွဲကို အုပ်စုအဆင့်တွင် တစ်ရက်(၈)ပွဲနှုန်းကျင်းပ မည်ဖြစ်ပြီး တစ်ပွဲလျင် မိနစ်(၃၀)စီ နှစ်ပိုင်းခွဲကစားရမည် ဖြစ်သည်။ အုပ်စုအဆင့်ကို အောက်တိုဘာ ၂၄ ရက်နေ့မှ ၂၇ ရက်နေ့အထိ၊ ရှုံးထွက်အဆင့်ကို အောက်တိုဘာ ၂၉ ရက်နေ့မှ ၃၀ ရက်နေ့အထိ၊ ဗိုလ်လုပွဲ၊ တတိယနေရာလုပွဲနှင့် ဆုပေးပွဲကို နိုဝင်ဘာ (၁)ရက်နေ့ ပဒုမ္မာကွင်းတွင် ပြုလုပ်သွားမည်ဖြစ်သည်။

MFF U13 Girls 100 PLUS Super Cup 2015 အုပ်စုခွဲဝေမှု
အုပ်စု(က)
၁။ ကယားပြည်နယ်
၂။ ရှမ်း(တောင်)
၃။ ကရင်ပြည်နယ်
၄။ ရှမ်း (အရှေ့)
၅။ ပဲခူး (အနောက်)

အုပ်စု(ခ)
၁။ ရခိုင်ပြည်နယ်
၂။ ပဲခူး (အရှေ့)
၃။ မွန်ပြည်နယ်
၄။ ဧရာဝတီ တိုင်းဒေသကြီး

အုပ်စု(ဂ)
၁။ မကွေးတိုင်း ဒေသကြီး
၂။ ကချင်ပြည်နယ်
၃။ ရှမ်း (မြောက်)
၄။ စစ်ကိုင်းတိုင်း ဒေသကြီး
၅။ ရန်ကုန်တိုင်းဒေသကြီး

အုပ်စု(ဃ)
၁။ မန္တလေးတိုင်း ဒေသကြီး
၂။ နေပြည်တော်
၃။ တနင်္သာရီတိုင်းဒေသကြီး
၄။ ချင်းပြည်နယ်