ဗီယက်နမ် နိုင်ငံတွင် နိုဝင်ဘာ ၂၀ ရက်မှ ၂၉ ရက်အထိ ကျင်းပမည့် International U-21 Football Tournament Youth Newspaper Cup 2015 ပြိုင်ပွဲကို ဝင်ရောက် ယှဉ်ပြိုင်မည့် မြန်မာ့လက်ရွေးစင် ယူ-၂၁ အသင်း၏ လူစာရင်းကို ထုတ်ပြန်လိုက်ပြီ ဖြစ်သည်။

မြန်မာ ယူ-၂၁ အသင်း၏ အပြီးသတ် လူစာရင်းတွင် ကစားသမား ၂၀ ဦးသာ ပါဝင်လာခဲ့ပြီး ဂိုးသမား ၂ ဦးနှင့် ကစားသမား ၁၈ ဦး ရွေးချယ်ထားသည်။ အဆိုပါ အပြီးသတ် လူစာရင်းတွင် ပြီးခဲ့သည့် နယူးဇီလန် ယူ-၂၀ ကမ္ဘာ့ဖလား ပြိုင်ပွဲဝင် အသင်းမှ ကစားသမား ၉ ဦးဖြင့် အများဆုံး ပါဝင်နေပြီး အာရှ ယူ-၁၉ ခြေစစ်ပွဲဝင် အသင်းမှ ကစားသမား ၆ ဦး ပြန်လည် ပါဝင်လာသည်။

မြန်မာ ယူ-၂၁ အသင်းသည် အဆိုပါ ပြိုင်ပွဲတွင် အုပ်စု (ခ)၌ HAGL ယူ-၂၁ အသင်း၊ တောင်ကိုရီးယား ယူ-၁၉ အသင်းတို့နှင့် အတူ ကျရောက်နေပြီး အုပ်စု အဖွင့်ပွဲ အဖြစ် နိုဝင်ဘာ ၂၀ ရက်တွင် အာဆင်နယ် အကယ်ဒမီ ယူ-၂၁ အသင်း ဖြစ်သည့် HAGL ယူ-၂၁ အသင်းနှင့် ရင်ဆိုင်ရမည် ဖြစ်သည်။ မြန်မာ ယူ-၂၁ အသင်းသည် ဒုတိယ ပွဲအဖြစ် နိုဝင်ဘာ ၂၂ တွင် တောင်ကိုရီးယား ယူ-၁၉ အသင်းနှင့် ကစားရမည် ဖြစ်သည်။ အဆိုပါ ပွဲစဉ် ၂ ပွဲတွင် အခြေအနေ ကောင်းခဲ့ပါက ဆီမီးဖိုင်နယ်သို့ တက်ရောက် နိုင်မည်ဖြစ်ပြီး အုပ်စု အောက်ဆုံး၌သာ ရပ်တည်ခဲ့ပါက ပဉ္စမနေရာ လုပွဲကို ယှဉ်ပြိုင်ရမည် ဖြစ်သည်။ ပဉ္စမနေရာလုပွဲနှင့် ဆီမီးဖိုင်နယ် ပွဲစဉ် ၁ ကို နိုဝင်ဘာ ၂၆ တွင် ကျင်းပမည် ဖြစ်ပြီး ဆီမီးဖိုင်နယ် ပွဲစဉ် ၂ ကို နိုဝင်ဘာ ၂၇ တွင် ကျင်းပမည် ဖြစ်သည်။ ဗိုလ်လုပွဲနှင့် တတိယနေရာ လုပွဲများကိုမူ နိုဝင်ဘာ ၂၉ တွင် ကျင်းပမည် ဖြစ်သည်။

မြန်မာ ယူ-၂၁ အသင်း၏ အုပ်ချုပ်/နည်းပြများ

ဦးတင်မြင့်အောင် (အသင်းအုပ်ချုပ်သူ၊ မြန်မာနိုင်ငံ ဘောလုံးအဖွဲ့ချုပ်)
အဲရစ်ဝီလျံ (နည်းပြချုပ်၊ မြန်မာနိုင်ငံ ဘောလုံးအဖွဲ့ချုပ်)
ဦးညီညီလတ် (လက်ထောက်နည်းပြ၊ မြန်မာနိုင်ငံ ဘောလုံးအဖွဲ့ချုပ်)
ဦးယဉ်မင်းအောင် (ဂိုးနည်းပြ၊ ရတနာပုံ)
ဦးကျော်သန့်ဇင် (ဆရာဝန်၊ မြန်မာနိုင်ငံ ဘောလုံးအဖွဲ့ချုပ်)

မြန်မာ ယူ-၂၁ အသင်း ကစားသမားများ

ဂိုး – ဘုန်းသစ္စာမင်း၊ ဆန်းဆက်နိုင် (MFF Youth)။
နောက် – ထိုက်ထိုက်အောင် (ဧရာဝတီ ယူနိုက်တက်)၊ သိန်းဇော် (ဇွဲကပင် ယူနိုက်တက်)၊ နိုင်လင်းထွန်း (မကွေး)၊ နန်းဝေမင်း (ရန်ကုန် ယူနိုက်တက်)၊ ရဲရင့်အောင်၊ စိုးမိုးထွန်း (MFF Youth)။
လယ် – မျိုးကိုထွန်း (ရတနာပုံ)၊ ရန်နိုင်ဦး (ဇေယျာရွှေမြေ)၊ စွမ်းထက်အောင် (ရန်ကုန် ယူနိုက်တက် လူငယ်)၊ ကျော်ဇေယျ၊ မောင်မောင်လွင် (ဟံသာဝတီ ယူနိုက်တက်)၊ လှိုင်မျိုးအောင် (ကမ္ဘောဇ)၊ ဇင်ဖြိုးအောင် (ဇွဲကပင် ယူနိုက်တက်)၊ အောင်မိုးသူ (MFF Youth)။
ရှေ့ – သန်းဇော်ဟိန်း၊ မောင်မောင်စိုး (မကွေး)၊ သန်းပိုင် (ရန်ကုန် ယူနိုက်တက်)၊ ရှိုင်းသူရ (ရတနာပုံ)။