၂၀၁၆ မြန်မာ နေရှင်နယ်လိဂ် Ooredoo MNL 2016 အဖွင့်ပွဲစဉ်များကို ယနေ့ ဇန်နဝါရီ ၉ ရက်၊ ညနေ (၄)နာရီက ရန်ကုန်မြို့ အောင်ဆန်းကွင်းနှင့် သုဝဏ္ဏကွင်း တို့တွင် တစ်ချိန်တည်း ကျင်းပခဲ့ရာ အောင်ဆန်းကွင်း ပွဲစဉ်တွင်ဇေယျာရွှေမြေ အသင်းက တန်းတက်အသင်းသစ် Horizon FC ကို (၁-၂) ဂိုးဖြင့် အနိုင်ရရှိခဲ့ပြီး သုဝဏ္ဏကွင်းတွင်ရခိုင် ယူနိုက်တက် အသင်းကလည်း တန်းတက်အသင်း ဆောက်သမ်းမြန်မာ ကို(၂-၁)ဂိုးဖြင့် အနိုင်ရရှိခဲ့သည်။ရခိုင်နှင့် ဆောက်သမ်းမြန်မာ ပွဲစဉ်တွင် ရခိုင်အသင်းက ဘရာဇီးလ် လူမျိုးကွင်းလယ် ဖန်တီးရှင် အန်ဒေရကော်တင်ဟိုကို အားပြုပြီး ယခုရာသီအတွက် အသစ်ခေါ်ထားသည့် ဒွေးကိုကိုချစ်၊ မျိုးဇော်ဦး၊ ဖိလစ်ပီ အစရှိသည့်ကစားသမားများနှင့် ဆောက်သမ်းမြန်မာ အသင်းကို ပွဲအစမှပင် ဖိအားပေး တိုက်စစ်ဆင် ကစားနိုင်ခဲ့ သည်။

ဆောက်သမ်း မြန်မာအသင်းသည် ယခုရာသီတွင် ပြည်တွင်း ကစားသမားများကိုသာ အသုံးပြုမည်ဖြစ်ရာ ဝါရင့်ရှေ့တန်းလူ ရဲအောင်၊ ဂိုးသမား ပြည့်ဖြိုးအောင်တို့ ဦးဆောင်သည့် လူဟောင်း၊ လူသစ် ကစားသမားများ အတွဲညီညီပေါင်းစပ်ပြီး ရခိုင် ယူနိုက်တက် အသင်း ကိုရင်ဆိုင်ခဲ့သည်။ ပွဲချိန်ပထမပိုင်းတွင် ရခိုင်ယူနိုက်တက်အသင်း တိုက်စစ်ဖွင့်ပြီး ကစားကွက် အသာစီးဖြင့် ဆောက်သမ်းမြန်မာ အသင်းကို မိနစ်၂၀ ကျော် ဖိအားပေးထား နိုင်ခဲ့သည်။ ရခိုင်အသင်း ရရှိသည့် ပြစ်ဒဏ်ဘော၊ ထောင့်ကန်ဘောများမှ အကြိမ်ကြိမ် ထိုးဖောက် ဂိုးသွင်းမှုများကို ဆောက်သမ်း ဂိုးသမား ပြည့်ဖြိုးအောင် ပုတ်ထုတ်ကာကွယ် ထားနိုင်သဖြင့် ဂိုးအဖြစ်ပြောင်းလဲ သွားနိုင်ခဲ့ခြင်း မရှိပေ။ ပွဲချိန် ၄၅ မိနစ် တွင် ဆောက် သမ်းမြန်မာ အသင်းတန်ပြန် တိုက်စစ်ဆင်မှ တစ်ဆင့် ဦးဆောင်ဂိုး ရရှိခဲ့ပြီး ထိုဂိုးကို ရှေ့တန်းလူ  ခိုင်ဇော်ထွန်းက လှလှပပ အဆုံး သတ်ပေးခဲ့ခြင်း ဖြစ်သည်။

ဒုတိယပိုင်းတွင် ရခိုင် ယူနိုက်တက် အသင်းချေပဂိုးအတွက် ပြန်လည် ပြင်ဆင်လာခဲ့ပြီး ဆောက်သမ်းမြန်မာ အသင်းဘက် သို့ ဘောလုံး ပိုင်ဆိုင်မှု အသာစီးဖြင့် ကြိုးစား ကစားလာခဲ့သည်။ ပွဲချိန် ၅၃ မိနစ်၊ ၈၆ မိနစ်များတွင် ရခိုင်အသင်း၏ ဘရာဇီးလ် ကွင်းလယ်လူ အန်ဒရေက အဖိုးတန် ချေပဂိုးနှင့် အနိုင်ဂိုးများ သွင်းယူနိုင်ခဲ့ သောကြောင့် ပွဲအပြီးတွင် ရခိုင် ယူနိုက်တက် အသင်း (၂-၁)ဂိုး အနိုင်ဖြင့် ၂၀၁၆ ရာသီသစ် တာထွက်ကောင်း သွားခဲ့သည်။

” ကစားသမားတွေ အနေနဲ့ အနိုင်ဂိုးကို ထိန်းမထားနိုင်ခဲ့ပါဘူး။ စိုးရိမ်စိတ်က များသွားကြတယ်။ တစ်ဖက် အသင်းကနိုင်ငံခြားသား ကစားသမား အစွမ်းကြောင့် ၂ ဂိုးပေးလိုက်ရတာပါ။ ပြည်တွင်း ကစားသမားတွေ ချည်းပဲဆိုပေမဲ့ပြည်ပ ကစား သမားတွေနဲ့ အများကြီး ကွာခြားမှု သိပ်မရှိပါဘူး။” ဟု ပွဲဦးထွက် အရေးနိမ့်ခဲ့ရသည့် ဆောက်သမ်းအသင်းနည်းပြ ဦးမြလွင်က ဆိုသည်။

” ကစားသမား အစုံနဲ့ စုပေါင်းလေ့ကျင်ရတဲ့ ရက်က ၂ ပတ်သာသာ ပဲရှိပြီး လုံလောက်မှု သိပ်မရှိခဲ့တာကြောင့် အချိတ် အဆက် မမိခဲ့ပါဘူး။ ဒီနေ့ပွဲ နိုင်ပွဲရတယ် ဆိုပေမဲ့လည်း ကစားပုံကို အားမရသေးပါဘူး။ ဖြစ်ဖြစ်မြောက်မြောက် မရှိသေး ဘူး။ လိုအပ်ချက်တွေ အများကြီး ပြင်ဆင်ရပါဦးမယ်။ ဘောလုံးကတော့ ပရီးမီးယားလိဂ်မှာ ကစားတဲ့ ဘောလုံး ဆိုတာကြောင့် ဒီက လေ့ကျင့်ရေး ကွင်းတွေ နဲ့တော့ သိပ်အဆင်မပြေသေးဘူး။ မြေသား မကောင်းလို့ပါ။ ကွင်းကောင်းမယ် ဆိုရပါတယ်။ မြေသား မာမယ်ဆိုရင်တော့ နည်းနည်း ကစားရတာ ခတ်တယ်” ဟု ရခိုင် ယူနိုက်တက် အသင်းနည်းပြ ဦးအောင်ဇော်မျိုးက မီဒီယာများ မေးမြန်းမှုကို ဖြေကြားခဲ့သည်။

ရခိုင်ယူနိုက်တက် အသင်းသည် လာမည့်အပတ် Week-2 ပွဲစဉ်အဖြစ် ဇန်နဝါရီ ၁၇ ရက်နေ့၊ ညနေ (၃း၃၀)နာရီ မုံရွာ ကွင်းတွင် ဇေယျာရွှေမြေ အသင်းနှင့်လည်းကောင်း၊ ဆောက်သမ်းမြန်မာ အသင်းသည် ယင်းနေ့ ညနေ (၄း၀၀)နာရီ၊   အောင်ဆန်းကွင်းတွင် ရှမ်းယူနိုက်တက် အသင်းနှင့် လည်းကောင်း ယှဉ်ပြိုင် ကြရမည်ဖြစ်သည်။