တောင်ကိုရီးယားအမျိုးသမီးလက်ရွေးစင်အသင်းသည် ၂၀၁၆ခုနှစ် ဇွန်တွင် မြန်မာနိုင်ငံသို့လာရောက်ကာ မြန်မာအမျိုး သမီးလက်ရွေးစင်အသင်းနှင့် ခြေစမ်းပွဲကစားမည်ဖြစ်သည်။

ကိုရီးယားအမျိုးသမီးအသင်းသည် ၂၀၁၆ ခုနှစ် ဇွန်(၂)ရက်တွင် ရန်ကုန်မြို့သို့ရောက်ရှိမည်ဖြစ်ပြီး ခြေစမ်းပွဲကစားရန်အတွက် မန္တလေးမြို့သို့ ဆက်လက်ထွက်ခွာမည်ဖြစ်သည်။ ကိုရီးယားအမျိုးသမီးအသင်း အနေဖြင့် မြန်မာအမျိုးသမီးလက်ရွေးစင် အသင်းနှင့် ခြေစမ်းပွဲ နှစ်ပွဲကစားသွားမည်ဖြစ်သည်။ ပထမခြေစမ်းပွဲကို ဇွန် (၄)ရက်တွင် လည်းကောင်း၊ ဒုတိယပွဲစဉ်ကို ဇွန် (၆)ရက်တွင်လည်းကောင်း ကစားမည်ဖြစ်သည်။ အဆိုပါ မြန်မာ့လက်ရွေးစင် အမျိုးသမီးဘောလုံး အသင်းနှင့် တောင်ကိုရီးယား လက်ရွေးစင်အမျိုးသမီး ဘောလုံးအသင်းတို့၏ ခြေစမ်းပွဲကို မန္တလေးမြို့ ၊ မန္တလာသီရီအားကစားကွင်းတွင် ညနေ ၅:၀၀ နာရီ၌ စတင်ကစားမည်ဖြစ်သည်။ မြန်မာအမျိုးသမီးအသင်းသည် တောင်ကိုရီးယား အသင်းနှင့် ခြေစမ်းပွဲ မကစားမီ ဂျပန်နိုင်ငံသို့ မေ (၅)ရက်မှ စတင်ကာ သွားရောက် စခန်းသွင်း လေ့ကျင့်မည်ဖြစ်ပြီး မေ(၂၅)တွင် မြန်မာနိုင်ငံသို့ပြန်လည်ရောက်ရှိမည်ဖြစ်သည်။ ထို့နောက် ဇွန် ၄ ရက်နှင့် ၆ ရက်များတွင် ကိုရီးယားအသင်းနှင့် ထပ်မံ ခြေစမ်းကစားမည်ဖြစ်သည်။ လက်ရှိတွင် မြန်မာအမျိုးသမီး အသင်းသည် ကစားသမား (၂၆)ယောက်ဖြင့် လေ့ကျင့်မှုများပြုလုပ်လျက်ရှိသည်။