Alpine Cup 2018 ပြိုင်ပွဲ၏ နောက်ဆုံးနေ့ ပြိုင်ပွဲများနှင့် ဆုပေးပွဲအခမ်းအနားများကို မန္တလေး မြို့ မန္တလာသီရိအားကစားကွင်းတွင် ညနေ ၃း၀၀ အချိန်မှစတင်ကျင်းပခဲ့သည်။

ယနေ့ ပွဲစဉ်များ၏ ပထမပွဲစဉ် အဖြစ် ယှဉ်ပြိုင်ကစားခဲ့သည့် တောင်ကိုရီးယား ယူ-၁၉ အသင်းနှင့် ဘာရိန်း ယူ-၂၃ အသင်းတို့၏ပွဲစဉ်တွင် တောင်ကိုရီးယားယူ-၁၉ အသင်းက ၂-၁ ဂိုးဖြင့် အနိုင်ရရှိခဲ့သည့်အတွက် Alpine Cup 2018 ပြိုင်ပွဲ၏ ချန်ပီယံအဖြစ် ရပ်တည်နိုင်ခဲ့သည်။

ဒုတိယပွဲစဉ်အဖြစ် ယှဉ်ပြိုင်ကစားခဲ့သော ပွဲစဉ်တွင် မြန်မာယူ-၂၃ အသင်းက ထိုင်းယူ-၂၃ အသင်းကို ၂-၁ ဂိုးဖြင့် အနိုင်ရရှိပြီး ပြိုင်ပွဲ၏ ဒုတိယဆုကိုရယူနိုင်ခဲ့သည်။

ထို့နောက် ဆုပေးပွဲအခမ်းအနားကို ဆက်လက်ကျင်းပခဲ့ရာ ဂိုးသွင်းအများဆုံးဆုအား တောင်ကိုရီးယား ယူ-၁၉ အသင်းမှ ကျောနံပါတ်-၁၁  UM WONSANG က ရရှိခဲ့ပြီး ထိုဆုကို ကျန်းမာရေးနှင့်အားကစားဝန်ကြီးဌာန ဒုတိယညွှန်ကြားရေးမှူး ဦးထွန်းမြင့်ဦးက ချီးမြှင့်ပေးခဲ့သည်။

ပြိုင်ပွဲ၏ တန်ဖိုးအရှိဆုံးကစားသမားဆုကိုမူ တောင်ကိုရီးယားယူ-၁၉ အသင်းမှ HWANG TAEHYEON က ရရှိခဲ့ပြီး ထိုဆုကို မန္တလေးတိုင်းဒေသကြီး အစိုးရအဖွဲ့ လျှပ်စစ်နှင့်စွမ်းအင်ဌာန ဝန်ကြီး ဦးမျိုးတင့်က ချီးမြှင့်ခဲ့သည်။ ထို့နောက် တတိယရရှိသည့် ဘာရိန်းယူ-၂၃ အသင်းအား ဆုဆွဲပြားများကို မန္တလေးတိုင်းဒေသကြီးအစိုးရအဖွဲ့ သဘာဝအရင်းအမြစ်နှင့် သစ်တောဝန်ကြီးဌာန ဝန်ကြီး ဦးဇာနည်အောင်က ပေးအပ်ချီးမြှင့်ပေးခဲ့သည်။

ဒုတိယဆုရရှိသည့် မြန်မာယူ-၂၃ အသင်းအား မန္တလေးတိုင်းဒေသကြီးအစိုးရအဖွဲ့ လုံခြုံရေးနှင့်နယ်စပ်ရေးရာဝန်ကြီးဌာနဝန်ကြီး ဗိုလ်မှူးကြီးကျော်ကျော်မင်းက ဆုဆွဲပြားများပေးအပ်ခဲ့ပြီး ဆုကြေးငွေအမေရိကန်ဒေါ်လာ ၅၀၀၀ ကို မြန်မာနိုင်ငံဆိုင်ရာ ထိုင်းနိုင်ငံသံအမတ်ကြီး မစ္စတာဂျာမွန်လောင်းက ချီးမြှင့်ပေးခဲ့သည်။ ထို့နောက် ချန်ပီယံဆုဖလားဆွတ်ခူးခဲ့သည့် တောင်ကိုရီးယားယူ-၁၉ အသင်းအား မြန်မာနိုင်ငံဘောလုံးအဖွဲ့ချုပ် ဒုတိယဥက္ကဋ္ဌ ဒေါက်တာစိုင်းဆမ်ထွန်းက ဆုတံဆိပ်ဆွဲပြားများပေးအပ်ခဲ့ပြီ်း    မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော်က ဆုကြေးငွေအမေရိကန်ဒေါ်လာ ၁၀၀၀၀ ကို ပေးအပ်ခဲ့သည်။ ထို့နောက် မန္တလေးတိုင်းဒေသကြီးဝန်ကြီးချုပ် ဒေါက်တာဇော်မြင့်မောင်က ဆုဖလားကို ပေးအပ်ခဲ့ပြီး အခမ်းအနားကို ရုတ်သိမ်းခဲ့သည်။