အင်ဒိုနီးရှားနိုင်ငံ ဂျာကာတာမြို့တွင် ကျင်းပလျက်ရှိသည့် အာရှအားကစားပွဲတော် အမျိုးသား ဘောလုံးပွဲစဉ် အုပ်စု(F) အဖွင့်ပွဲစဉ်များကို သြဂုတ်လ ၁၅ ရက်နေ့က ကျင်းပခဲ့ရာ မြန်မာ ယူ၂၃ အသင်းသည် မြောက်ကိုရီးယား ယူ၂၃ အသင်းနှင့် (၁-၁)ဂိုးသရေ ကျခဲ့သည်။ မြန်မာအသင်းသည် ပွဲချိန်တလျှောက် အမှားအယွင်းနည်း စွာကစားခဲ့ပြီး ပြိုင်ဘက် မြောက်ကိုရီးယား အသင်းကို ပထမပိုင်း တစ်ချိန်လုံး ဖိအားပေးနိုင်ခဲ့သည်။ ပထမပိုင်း ပြီးကာနီး ပွဲချိန် ၄၅ မိနစ်တွင် တန်ပြန် တိုက်စစ်မှ အောင်သူ အကောင်းဆုံး ပေးပို့မှုကို မောင်မောင်လွင်က ၁၈ ကိုက်စည်းအတွင်း အပြင်းကန်သွင်းယူပြီး မြောက်ကိုရီးယားကို (ဝ-၁)ဂိုးဖြင့် ဦးဆောင်ထား နိုင်ခဲ့သည်။ ပထမပိုင်းတွင် အောင်သူ၊ မောင်မောင်လွင်၊ လှိုင်းဘိုဘိုတို့ အပိုင်ကန်သွင်းခွင့်များ ရရှိခဲ့ပြီး မြောက်ကိုရီးယားကို ဖိအားပေးထားနိုင်ခဲ့သည်။

ဒုတိယပိုင်းတွင် မြောက်ကိုရီးယားအသင်း ချေပဂိုး ရရှိရန် အစွမ်းကုန် ကြိုးပမ်းခဲ့ပြီး မြန်မာအသင်းဘက်သို့ အကြိမ်ကြိမ် ထိုးဖောက်တိုက်စစ် ဆင်ကစားနိုင်ခဲ့သည်။ မြောက်ကိုရီးယားအသင်း ကန်ချက်များကို ဂိုးသမား ကျော်ဇင်ထက် အကောင်းဆုံး ကာကွယ်နိုင်၍ ပြိုင်ဘက်အသင်း အခက်တွေ့ခဲ့ရသည်။ ပွဲချိန် မိနစ် ၆၀ တွင် ဂျန်ကွတ်ချူးက ခေါင်းတိုက်သွင်းယူပြီး ချေပဂိုးရရှိခဲ့သဖြင့် မြောက်ကိုရီးယားအသင်း ပြန်လည်ဦးမော့လာနိုင်ခဲ့သည်။  နောက်ပိုင်းတွင် အနိုင်ဂိုးရရှိရန် လူအပြောင်းအလဲ ပြုလုပ်ခဲ့သော်လည်း မြန်မာနောက်တန်းနှင့် ဂိုးသမားကို မကျော်လွန်နိုင်ခဲ့ပေ။ မြန်မာအသင်းဘက်မှ ပွဲချိန် မိနစ် ၇၀ ကျော်တွင် အောင်သူအပိုင်ကန်ချက် ဂိုးဘားတန်းထိထွက် သွားခဲ့သဖြင့် အနိုင်ဂိုးရရှိရန် နစ်နာခဲ့သည်။ ထပ်ဆောင်းအချိန်ပို ၄ မိနစ်အထိ နှစ်သင်းစလုံး အခွင့်အရေးများ အသုံးမချနိုင်ခဲ့ကြပဲ (၁-၁)ဂိုး သရေဖြင့်သာ ကျေနပ်ခဲ့ရသည်။

ပထမပွဲစဉ်ဖြစ်သည့် အီရန်နှင့်ဆော်ဒီအာရေဗျ ပွဲစဉ်မှာလည်း ဂိုးမရှိသရေ ဖြင့်ပြီးဆုံးသွားခဲ့ရာ အုပ်စု(F) အဖွင့်ပွဲစဉ်များ အပြီးတွင် မြန်မာအသင်းက ဇယားထိပ်ကို ဦးဆောင်ထားနိုင်ခဲ့သည်။ မြန်မာအသင်း အနေဖြင့် ဒုတိယပွဲစဉ်အား သြဂုတ် ၁၇ ရက်နေ့တွင် ဆော်ဒီအာရဗျ အသင်းနှင့်ရင်ဆိုင် ကစားရမည်ဖြစ်သည်။