မြန်မာနိုင်ငံဘောလုံးအဖွဲ့ချုပ်နှင့် ပညာရေးဝန်ကြီးဌာနမှ ကြီးမှူးကျင်းပ၍ 100PLUS မှ Title Sponsor အဖြစ် ပံ့ပိုးကူညီပေးသည့် MFF 100PLUS Cup ပြည်နယ်နှင့်တိုင်းဒေသကြီး ယူ-၁၄ အမျိုးသား ပြိုင်ပွဲ ဗိုလ်လုပွဲနှင့် ဆုပေးပွဲ အခမ်းအနား ကို နိုဝင်ဘာ ၁၇ ရက် ညနေ ၄နာရီ အချိန်က မြန်မာအမျိုးသားအကယ်ဒမီ မြက်ခင်းတု ကွင်းတွင် ကျင်းပခဲ့သည်။

ယင်းအခမ်းအနားသို့ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော်၊ မြန်မာနိုင်ငံဘောလုံးအဖွဲ့ချုပ် အမှုဆောင် အဖွဲ့ဝင် ဦးမိုးဆန်းအောင်၊ မြန်မာနိုင်ငံဘောလုံးအဖွဲ့ချုပ် စည်းကမ်းထိန်းသိမ်းရေး ကော်မတီ ဥက္ကဋ္ဌ ဦးခင်မောင်ကြိုင်၊ မြို့နယ်ဘောလုံးအဖွဲ့ချုပ် ဖွဲ့စည်းရေးကော်မတီ ဥက္ကဋ္ဌ ဦတင်အောင်၊ ဧရာဝတီယူနိုက်တက် အသင်းဥက္ကဋ္ဌ ဦးမင်းလှိုင်၊ ရန်ကုန်တိုင်းဒေသကြီး အခြေခံပညာဦးစီးဌာန ဒုတိယ ညွှန်ကြားရေးမှူးချုပ် ဒေါ်ခင်မာဆွေ၊ မန္တလေးတိုင်း ဒေသကြီး

အခြေခံပညာဦးစီးဌာန ဒုတိယ ညွှန်ကြားရေးမှူးချုပ် ဒေါ်စန်းစန်းရီ၊ 100PLUS မှ Commerical Manager မစ္စတာ ပရာပတ်၊ ရွှေခေတ် မြန်မာ့လက်ရွေးစင် ဘောလုံးသမားဟောင်းများဖြစ်ကြသော ဦးတင်အောင် (ဂိုး)၊ ဦးအောင်ခင်၊ အစရှိသည့် ကစားသမား ဟောင်းကြီးများ၊ ဧည့်သည်တော်များနှင့် ဆုရရှိကြသော အသင်းများမှ ကစားသမားများ၊ အုပ်ချုပ်နည်းပြများ တက်ရောက်ခဲ့ကြသည်။

ယင်းပြိုင်ပွဲ၏ ဗိုလ်လုပွဲစဉ် အဖြစ် ကယားပြည်နယ် အသင်းနှင့် မန္တလေးတိုင်းဒေသကြီး အသင်းတို့က ယှဉ်ပြိုင် ကစားခဲ့ကြပြီး ပွဲ အပြီးတွင် မန္တလေးတိုင်း ဒေသကြီး အသင်းက ၂-၀ ဂိုးဖြင့် အနိုင်ရရှိခဲ့ပြီး ချန်ပီယံဆုကို ရရှိခဲ့သည်။ မန္တလေးတိုင်း ဒေသကြီး အသင်းအတွက် ဂိုးများကို ဇင်ကိုကိုနှင့် အောင်ရဲဦး တို့က သွင်းယူပေးခဲ့ကြခြင်းဖြစ်သည်။