MFF Women’s League 2018-19 ပြိုင်ပွဲ (Week-3) ပွဲစဉ် ၃ ၏ ပထမဆုံးပွဲစဉ်ဖြစ်သော ISPE FC အသင်းနှင့် Thitsar Arman FC အသင်းတို့ ပွဲစဉ်တွင် သရေ ရလဒ် ထွက်ပေါ်ခဲ့သည်။

ပွဲအစပိုင်းတွင် နှစ်သင်းစလုံး အပြန်အလှန် ထိုးဖောက် ကစားခဲ့ပြီး ပွဲချိန် ၁၆ မိနစ်တွင် Thitsar Arman နောက်တန်းမှ ပြန်လည် ပေးပို့မှုကို ဂိုးသမား ကန်တင်ရာ၌ ခင်မာလာထွန်းနှင့်ထိပြီး ဂိုးဝင်သွားခဲ့ရာ ISPE အသင်း ဦးဆောင်ဂိုး ရရှိခဲ့သည်။

ထို့ပြင် ပွဲချိန် ၃၃ မိနစ်တွင်လည်း ISPE အသင်းအတွက် ဒုတိယဂိုးကို ရီရီဦးက သွင်းယူပေးခဲ့သည်။ ပွဲချိန် ၄၂ မိနစ်တွင်မူ Thitsar Arman အသင်းအတွက် ချေပဂိုးကို နော်အားလိုဝါးဖောက သွင်းယူခဲ့ပြီး ပထမပိုင်းအပြီး၌ ISPE အသင်းက ၂-၁ ဂိုးဖြင့် ဦးဆောင်နိုင်ခဲ့သည်။

ဒုတိယပိုင်း ပြန်လည် စတင်ချိန်တွင် Thitsar Arman အသင်းက ချေပဂိုးရရေးအတွက် တိုက်စစ်မြှင့်လာခဲ့ပြီး ISPE အသင်းက တန်ပြန် တိုက်စစ်ဖြင့်သာ ပြန်လည် တုန့်ပြန်ခဲ့သည်။ ပွဲချိန် မိနစ် ၇၀ တွင် Thitasr Arman အသင်း ချေပဂိုး ရရှိခဲ့ပြီး နီလာဝင်းက သွင်းယူခဲ့သည်။

ချေပဂိုး နှစ်ဂိုးပေးလိုက်ရပြီးနောက် ISPE အသင်း ကစားအားတင်ခဲ့ပြီး Thitsar Arman ဘက်သို့ ပြန်လည်ဖိအားပေး ခဲ့သော်လည်း ဂိုးမရဘဲ ဖြစ်နေခဲ့သည်။ လက်ကျန် ပွဲချိန်များတွင် နှစ်သင်းစလုံး ဂိုးထပ်မံ သွင်းယူနိုင်ကြခြင်း မရှိသဖြင့် နှစ်ဂိုးစီ သရေဖြင့်သာ ပွဲပြီးဆုံးခဲ့သည်။