မြန်မာနိုင်ငံ ဘောလုံးအဖွဲ့ချူပ်သည် ဆီးဂိမ်းစ်ပြိုင်ပွဲနှင့် AFC U-23 ခြေစစ်ပွဲဝင် မြန်မာယူ-၂၃ အသင်းနည်းပြချူပ် အဖြစ် ဘူလ်ဂေးရီးယား နည်းပြ ဗီလီဇာ ပိုပေါ့အား ယခုအပတ်အတွင်း ခန့်အပ်တာဝန် ပေးသွားမည်ဖြစ်သည်။

အသက် (၄၂)နှစ်အရွယ် UEFA Pro လိုင်စင်ရ နည်းပြ ပိုပေါ့သည် ဘူလ်ဂေးရီးယား၊ မော်လ်ဒိုဗာ၊ မော်လဒိုက်စ်၊ အိုမန်၊ ထိုင်း၊ မလေးရှား စသည့်နိုင်ငံများတွင် နည်းပြအဖြစ် ကျင်လည်ခဲ့သူ ဖြစ်သည်။ ပိုပေါ့အနေဖြင့် လာမည့် ၂၀၁၉ ဖေဖော်ဝါရီ ၄ ရက်နေ့တွင် မြန်မာ ယူ-၂၃ အသင်းအား လေ့ကျင့်မှုများ စတင်ပြုလုပ်သွားရန် စီစဉ်ဆောင်ရွက်လျက် ရှိသည်။

” အာရှ ဘောလုံးအဖွဲ့ချူပ် ပြိုင်ပွဲတွေမှာ ပရိုလိုင်စင်၊ (A) လိုင်စင် နည်းပြတွေကိုပဲ လက်ရွေးစင် အသင်းနဲ့ ယူ-၂၃ လက်ရွေးစင် အသင်းတွေကို ကိုင်တွယ်ခွင့်ရှိပါတယ်။ ပိုပေါ့ဟာ UEFA ပရိုလိုင်စင်နည်းပြ ဖြစ်သလို ကျွန်တော်တို့ သွားချင်တဲ့ Myanmar Football Philosophy အတိုင်းလုပ်ဖို့ ရှင်းရှင်းလင်းလင်း ပြောထားပြီးပါပြီ။ သူလည်း လုပ်နိုင်မယ်လို့ ကျွန်တော် ယုံကြည်ပါတယ်။ ခေတ်အခြေအနေက တောင်းဆိုတဲ့အတိုင်း အဆင့်မြင့်မားတဲ့ လိုင်စင်နည်းပြကိုပဲ အသင်းကိုတာဝန် ပေးရမှာပါ။ ယူ -၂၃ အသင်းဟာ စီနီယာ လက်ရွေးစင် အသင်းနဲ့ အနီးကပ်ဆုံး ဖြစ်တဲ့အတွက် ဒီအသင်းကို အဆင့်မြင့်သွားအောင် တည်ဆောက်ရမှာဖြစ်ပါတယ်။ ဒါ့အပြင် အသင်းကို Professional ကျကျ ပြင်ဆင်လေ့ကျင့် ပျိုးထောင်သွားရမှာပါ” ဟု MFF Technical Director မစ္စတာ အဲရစ်ကျေပာသည်။

” ဦးကြည်လွင်ကိုလည်း သူကြိုးပမ်းသွားခဲ့တာတွေအတွက် ကျေးဇူးတင်ပါတယ်။ သူ့အနေနဲ့ A လိုင်စင်အောင်မြင်ဖို့ ကြိုးပမ်းသင့်သလို တဖြည်းဖြည်း အရည်အချင်းမြင့်မားတဲ့ နည်းပြဖြစ်အောင်လည်း ကြိုးစားသင့်ပါတယ်။ ကျွန်တော်တို့ သွားမယ့် လမ်းကြောင်းအတိုင်း ဆိုရင် ပရော်ဖက်ရှင်နယ် ပီသဖို့၊ စည်းကမ်းတကျကိုင်တွယ်နိုင်ဖို ့ အရေးကြီးပါတယ်။ ” ဟုဦးကြည်လွင်ကို လက်တွဲဖြုတ်လိုက်ရခြင်းနှင့် ပတ်သက်၍လည်း အဲရစ်က ရှင်းလင်းဖြေကြားခဲ့သည်။

အသစ်ခန့်အပ်မည့် နည်းပြသည် AFC အသိအမှတ်ပြု ပရိုလိုင်စင် (သို့) A လိုင်စင်နှင့် ယင်းထက်မြင့်သော UEFA လိုင်စင်ရှိထားရန်၊ စည်းကမ်းကောင်းမွန်ပြီး အရက်သေစာ သောက်စားမှု မရှိစေရန်၊ အသင်းအား အကောင်းဆုံး ဦးဆောင်နိုင်ပြီး ပရော်ဖက်ရှင်နယ် ပီသရန် စသည့် Technical Director မစ္စတာ အဲရစ်၏ နည်းပြများ ရွေးချယ်ခန့်အပ်မှု ပေါ်လစီကို မြန်မာနိုင်ငံ ဘောလုံး အဖွဲ့ချူပ် နည်းစနစ်ကော်မတီ အနေဖြင့် သဘောတူညီ ခွင့်ပြုခဲ့သည်။

နိုင်ငံ ကိုယ်စားပြု လက်ရွေးစင် အသင်းများတွင် ယခင်ကရှိခဲ့သည့် စည်းကမ်း ဖောက်ဖျက်မှုများ၊ အရက်သေစာ သောက်စားမှုများကို စာနာ ထောက်ထားခဲ့သော်လည်း ယနေ့အချိန်တွင် ထိုသို့ပြုမှုများအား သိရှိသည်နှင့်တပြိုင်နက် ချက်ခြင်း အရေးယူ အပြစ်ပေးရန်နှင့် ပြည်သူလူထုထံ အသိပေး ကြေညာချက် ထုတ်ရန်တို့ကိုလည်း နည်းစနစ် ကော်မတီက လမ်းညွှန်လိုက်သည်။