မြန်မာ့လက်ရွေးစင် ဖူဆယ်အသင်းသည် ဧပြီ ၆ ရက် နေ့လယ်ပိုင်းက ယှဉ်ပြိုင်ကစားခဲ့သော တီမော အသင်းနှင့် ပွဲစဉ်တွင် (၁၀-၃)ဂိုးဖြင့် အနိုင်ရရှိပြီး အုပ်စုပထမဖြင့် ဆီမီးဖိုင်နယ်သို့ တက်ရောက်သွားခဲ့ပြီဖြစ်သည်။

မြန်မာ့လက်ရွေးစင် ဖူဆယ်အသင်းသည် ယခုပွဲစဉ်တွင်လည်း အကောင်းဆုံးပုံစံဖြင့် ကစားနိုင်ခဲ့ကာ ပထမပိုင်းတွင် မြန်မာအသင်းက (၇-၂)ဂိုးဖြင့် အနိုင်ရနေပြီး အနိုင်ဂိုးများကို လှိုင်မင်းထွန်းက ၃ဂိုး၊ မျိုးသက်အောင်က ၃ဂိုး၊ သိုင်းဘွဲ့အောင်က ၁ဂိုး သွင်းယူပေးခဲ့သည်။

ပွဲချိန် ဒုတိယပိုင်းတွင်လည်း မြန်မာအသင်းက ခြေစွမ်းအသာဖြင့် ကစားခဲ့ကာ မျိုးမြင့်စိုး၊ ဝေဇင်ဦးနှင့် လှိုင်မင်းထွန်းတို့က ဂိုးများထပ်မံ သွင်းယူနိုင်ခဲ့ပြီး ပွဲအပြီးတွင် (၁၀-၃)ဂိုးဖြင့် အနိုင်ရရှိခဲ့ခြင်းဖြစ်သည်။

အုပ်စု(ခ) အစောပိုင်းပွဲဖြစ်သော ဗီယက်နမ်နှင့် ဩစတြေးလျ အသင်းတို့၏ ပွဲစဉ်တွင်ဗီယက်နမ်က (၅ – ၁) ဂိုးဖြင့် အနိုင်ရရှိခဲ့သော်လည်း မြန်မာအသင်းက ဂိုးကွာခြားချက် အသာဖြင့် အုပ်စုပထမနေရာမှ ဆီမီးဖိုင်နယ်သို့ တက်ရောက်နိုင်ခြင်းဖြစ်သည်။

မြန်မာ့လက်ရွေးစင်ဖူဆယ်အသင်းသည် ဆီမီးဖိုင်နယ်ပွဲစဉ်အဖြစ် ဧပြီ (၈)ရက်တွင် အုပ်စု (က)မှ ဒုတိယရသော အသင်းနှင့် ယှဉ်ပြိုင်ကစားရမည် ဖြစ်သည်။

မြန်မာ့လက်ရွေးစင် အသင်းနည်းပြချုပ် Mr. Bunlert Cheowarang က ” ကျွန်တော်တို့ဒီပွဲမှာ ၆ ဂိုးအနိုင်ရဖို့ လိုအပ်နေတာကြောင့် ပွဲစကတည်းက power playနဲ့ ကစားခဲ့တယ်။ ကစားသမားတွေအနေနဲ့ ဒီပွဲမှာ အာရုံစိုက်မှု အနည်းငယ်လိုအပ်ချက်ရှိခဲ့ပြီး ခံစစ်ကစားပုံ သိပ်မကောင်းခဲ့ဘူး။ ဒါပေမဲ့ ပွဲအပြီးမှာ (၁၀-၃ )ဂိုး ရလဒ်ကြောင့် ကျွန်တော်တို့ အနေနဲ့ ဂိုးပြတ်အနိုင်ရခဲ့ပြီး လိုအပ်တဲ့ ဂိုးတွေကိုရရှိခဲ့လို့ ပျော်ရွှင်ရပါတယ်”ဟု တီမော အသင်းနှင့် ပွဲစဉ် အပြီးတွင် ပြောကြားခဲ့သည်။