လာမည့်မေလအတွင်း ဗီယက်နမ်နိုင်ငံတွင် ကျင်းပပြုလုပ်မည့် (၃၁) ကြိမ်မြောက်အရှေ့တောင်အာရှအားကစားပြိုင်ပွဲ (ဆီးဂိမ်း) ၀င်ရောက်ယှဉ်ပြိုင်မည့် မြန်မာ့လက်ရွေးစင်ယူ-၂၃ အသင်းသည် ပြိုင်ပွဲအကြိုပြင်ဆင်မှုအဖြစ် ယူအေအီးနိုင်ငံသို့ ယနေ့ (ဧပြီ ၁၇ရက်) မနက်ပိုင်းက ထွက်ခွာသွားခဲ့သည်။

ယူအေအီးနိုင်ငံတွင် နှစ်ပတ်ခန့် သွားရောက်လေ့ကျင့်မည်ဖြစ်ပြီး လေ့ကျင့်ရေးကာလအတွင်း ယူအေအီးနိုင်ငံအခြေစိုက် ကလပ်အသင်းများနှင့် ‌ခြေစမ်းပွဲများကစားရန် စီစဉ်ထားသည်။

မြန်မာယူ-၂၃ အသင်းကို ပဏာမလက်ရွေးစင် ကစားသမား ၂၅ဦး၊ အုပ်ချုပ်နည်းပြအဖွဲ့၀င် ၉ဦး ဖြင့်ဖွဲ့စည်းထားပြီး နည်းပြချုပ်အဖြစ် ဗယ်လီဇာပိုပေါ့ဗ် က တာ၀န်ယူကိုင်တွယ်လျက်ရှိသည်။

ဆီးဂိမ်းပြိုင်ပွဲသည် အသက် (၂၃)နှစ်အောက်ပြိုင်ပွဲဖြစ်သော်လည်း သက်ကျော်ကစားသမား သုံးဦးထည့်သွင်းခွင့်ပြုထားရာ မြန်မာယူ-၂၃ အသင်း တွင် သက်ကျော်ကစားသမား ၈ ဦးကို ပဏာမလက်ရွေးစင်အဖြစ်ထည့် သွင်းရွေးချယ်ထားသည်။ သက်ကျော်ကစားသမားများအဖြစ် မောင်မောင်လွင်၊ အောင်ကောင်းမာန်၊ ဟိန်းထက်အောင်၊ ဆမ်လန်မန်၊ ဝင်းမိုးကျော်၊ ရဲမင်းသူ၊ အောင်နိုင်ဝင်း နှင့်သန်းပိုင် တို့က ပဏာမရွေးချယ်ထားသည်။ ယင်း (၈) ဦးအနက် နိုင်ငံခ​ြားလိဂ်များတွင် သွားရောက်ကစားနေသော မောင်မောင်လွင်၊ အောင်ကောင်းမာန်၊ ဟိန်းထက်အောင်၊ ဆမ်လန်မန် တို့မှာ ၎င်းတို့၏ လိဂ်ပြိုင်ပွဲများရှိနေသောကြောင့် ဒူဘိုင်းခရီးစဉ်ကို မလိုက်ပါနိုင်ဘဲ ဆီးဂိမ်းပြိုင်ပွဲမတိုင်ခင် ဗီယက်နမ်နိုင်ငံသို့ လာရောက်ပြီး မြန်မာယူ-၂၃အသင်းနှင့် ပူးပေါင်းမည်ဖြစ်သည်။

ဆီးဂိမ်းပြိုင်ပွဲအတွက် အပြီးသတ်လူစာရင်းကို လာမည် မေ ၅ရက်တွင် တရားဝင်ကြေညာမည်ဟု နည်းပြချုပ်ပိုပေါ့ဗ်က ဆိုသည်။

မြန်မာယူ-၂၃ အသင်းသည် ဆီးဂိမ်းပြိုင်ပွဲအုပ်စု(က) တွင် အိမ်ရှင် ဗီယက်နမ်၊ အင်ဒိုနီးရှား၊ ဖိလစ်ပိုင်၊ အရှေ့တီမော အသင်းများနှင့်တစ်အုပ်စုတည်းကျရောက်လျက်ရှိသည်။

အုပ်ချုပ်/နည်းပြအဖွဲ့

အသင်းအုပ်ချုပ်သူ- ဦးစည်သူ၀င်း
နည်းပြချုပ်- ဗယ်လီဇာပိုပေါ့ဗ်
လက်ထောက်နည်းပြ- ဦးဇော်ဝင်းထွန်း
လက်ထောက်နည်းပြ- ဦးအောင်အောင်ထွန်း
ဂိုးနည်းပြ- ဦးအောင်ကျော်ကျော်
အသင်းဆရာဝန်- ဒေါက်တာဖြိုးမင်းဦး
ကြံခိုင်ရေးနည်းပြ -ဦးထွန်းဇော်
အကြောကျွမ်းကျင်- ဦးသူရတိုး
ဝတ်စုံတာဝန်ခံ- ဦးချမ်းဝေစိုး

ပဏာမလက်ရွေးစင်လူစာရင်း

ဂိုး– ပြည့်ဖြိုးသူ၊ သူရ‌ကျော်၊ ပြည့်ဖြိုးအောင်၊ အောင်ကိုလတ်

နောက်တန်း – သက်ဟိန်းစိုး၊ စိုးမိုးကျော်၊ ဟိန်းဇေယျာလင်း၊ ၀င်းမိုးကျော်၊ ရဲမင်းသူ၊ သက်ပိုင်‌ထွေး၊ အောင်၀ဏ္ဏစိုး၊ ရဲလင်းထက်၊ နောင်နောင်စိုး

ကွင်းလယ်- ဇော်ဝင်းသိန်း၊ လွင်မိုးအောင်၊ လင်းထက်စိုး၊ ဝေလင်းအောင်၊ ရန်ကျော်စိုး၊ အောင်နိုင်၀င်း

ရှေ့တန်း– ရဲရင့်အောင်၊ ထက်ဖြိုးဝေ၊ ၀င်းနိုင်ထွန်း၊ မြတ်ကောင်းခန့်၊ ရာဇာအောင်၊ သန်းပိုင်