မြန်မာအမျိုးသမီး ဖူဆယ်အသင်းသည် NSDF Futsal Invitation Championship 2022 ပြိုင်ပွဲအတွက် ပွဲကြိုသတင်းစာရှင်းလင်းပွဲကို ဧပြီ ၁၉ ရက် နေ့လယ်တွင် ကျင်းပခဲ့သည်။

ထိုပွဲကြို သတင်းစာရှင်းလင်းပွဲသို့ ပြိုင်ပွဲဝင် အသင်းများ ဖြစ်ကြသော ထိုင်းအသင်း၊ ထိုင်းအောလ်စတားအသင်း၊ အင်ဒိုနီးရှားအသင်း၊ မြန်မာအသင်းနှင့် ဩစတြေးလျကလပ် ဆောက်ပါ့ခ်အသင်းတို့မှ နည်းပြချုပ်များ တက်ရောက်ခဲ့ကြသည်။

မြန်မာ့လက်ရွေးစင် အသင်းနည်းပြချုပ်က ဦးတင်မောင်‌ဌေးက “ဒီပြိုင်ပွဲဟာ ကျွန်တော်တို့အသင်းအတွက် အလွန်အကျိုးရှိပါတယ်။ပြိုင်ပွဲကစားနိုင်ဖို့ ဖိတ်ကြားပေးတဲ့ ထိုင်းဘောလုံးအဖွဲ့ချုပ်ကိုလည်း ကျေးဇူးတင်ပါတယ်။ ဆီးဂိမ်းပြိုင်ပွဲအကြို ကစားရတာဖြစ်လို့ အသင်း ပြင်ဆင်မှုအတွက် အထောက်အကူဖြစ်စေပြီး ခြေစွမ်းပိုကောင်းလာအောင် ကြိုးစားသွားမှာ” ဟု ပြိုင်ပွဲနှင့် ပတ်သက်၍ ပြောကြားခဲ့သည်။

အဆိုပါနေ့ နံနက်ပိုင်းတွင် မြန်မာအမျိုးသမီး ဖူဆယ်အသင်းသည် NSDF Futsal Invitation Championship 2022 ပြိုင်ပွဲ၏ Official Training ကို ပြိုင်ပွဲကျင်းပမည့် Eastern National Sports Training Center တွင် ပြုလုပ်ခဲ့သည်။

ပြိုင်ပွဲကို ဧပြီ ၂၀ မှ ၂၆ ရက်အထိ ထိုင်းနိုင်ငံ၊ ချောင်ဘူရီရှိ Eastern National Sports Training Center တွင် အုပ်စုပတ်လည်ပုံစံဖြင့် ကစားသွားမည်ဖြစ်ပြီး မြန်မာ့လက်ရွေးစင် အမျိုးသမီး ဖူဆယ်အသင်းသည် ပွဲဦးထွက်အဖြစ် ဧပြီ ၂၀ တွင် ထိုင်းအသင်းနှင့် ယှဉ်ပြိုင်ရမည်ဖြစ်သည်။