လာမည့် မေလအတွင်း ဗီယက်နမ်နိုင်ငံတွင် အိမ်ရှင်အဖြစ်လက်ခံကျင်းပမည့် (၃၁)ကြိမ်မြောက် အရှေ့တောင်အာရှအားကစားပြိုင်ပွဲ
(ဆီးဂိမ်းစ်) အတွက် အပြီးသတ်လူစာရင်းကို မေ ၅ရက်တွင် တရားဝင်ကြေညာမည်ဟု နည်းပြချုပ် ပိုပေါ့ဗ်က ဆိုသည်။

မြန်မာ့လက်ရွေးစင်ယူ-၂၃အသင်းသည် လက်ရှိတွင် ဆီးဂိမ်းစ်အကြိုပြင်ဆင်မှုအဖြစ် ယူအေအီးနိုင်ငံ၊ ဒူဘိုင်းတွင် စခန်းသွင်းလေ့ကျင့်လျက်ရှိပြီး ပဏာမလက်ရွေးစင်အဖြစ် ကစားသမား (၂၉)ဦးကို ရွေးချယ်ထားသည်။ မြန်မာ့လက်ရွေးစင်ယူ-၂၃အသင်းသည် (၃၁) ကြိမ်မြောက်ဆီးဂိမ်းစ်ပြိုင်ပွဲအတွက် ၂၀၂၁ခုနှစ် နှစ်စကတည်းက လေ့ကျင့်ပြင်ဆင်ခဲ့ခြင်းဖြစ်သည်။ မြန်မာ ယူ-၂၃အသင်းကို ၂၀၁၉ခုနှစ်က ဖိလစ်ပိုင်နိုင်ငံတွင် ကျင်းပခဲ့သော ဆီးဂိမ်းစ်ပြိုင်ပွဲတွင် ပါဝင်ခဲ့သည့် လွင်မိုးအောင်၊ မြတ်ကောင်းခန့်၊ ဝင်းနိုင်ထွန်း၊ စိုးမိုးကျော် အစရှိသော ကစားသမားများကိုအခြေခံပြီး ယူ-၁၉ အသင်းမှ ထွက်ပေါ်လာသော မျိုးဆက်သစ်ကစားသမားများကို ပေါင်းစပ်ဖွဲ့စည်းထားသည်။

ဆီးဂိမ်းပြိုင်ပွဲသည် အသက် (၂၃)နှစ်အောက်ပြိုင်ပွဲဖြစ်သော်လည်း သက်ကျော်ကစားသမား သုံးဦးထည့်သွင်းခွင့်ပြုထားရာ မြန်မာယူ-၂၃ အသင်း တွင် သက်ကျော်ကစားသမား ၈ ဦးကို ပဏာမလက်ရွေးစင်အဖြစ်ထည့် သွင်းရွေးချယ်ထားသည်။

သက်ကျော်ကစားသမားများအဖြစ် မောင်မောင်လွင်၊ အောင်ကောင်းမာန်၊ ဟိန်းထက်အောင်၊ ဆမ်လန်မန်၊ ဝင်းမိုးကျော်၊ ရဲမင်းသူ၊ အောင်နိုင်ဝင်း နှင့်သန်းပိုင် တို့က ပဏာမရွေးချယ်ထားသည်။ ယင်း (၈) ဦးအနက် နိုင်ငံခ​ြားလိဂ်များတွင် သွားရောက်ကစားနေသော မောင်မောင်လွင်၊ အောင်ကောင်းမာန်၊ ဟိန်းထက်အောင်၊ ဆမ်လန်မန် တို့မှာ ၎င်းတို့၏ လိဂ်ပြိုင်ပွဲများရှိနေသောကြောင့် ဒူဘိုင်းခရီးစဉ်ကို မလိုက်ပါနိုင်ဘဲ ဆီးဂိမ်းပြိုင်ပွဲမတိုင်ခင် ဗီယက်နမ်နိုင်ငံသို့ လာရောက်ပြီး မြန်မာယူ-၂၃အသင်းနှင့် ပူးပေါင်းမည်ဖြစ်သည်။

မြန်မာယူ-၂၃အသင်းသည် ဒူဘိုင်းခရီးစဉ်တွင် ယူအေအီးကလပ်အသင်း (၄)သင်းဖြင့် ခြေစမ်းပွဲယှဉ်ပြိုင်ကစားမည်ဖြစ်သည်။

မြန်မာယူ-၂၃ အသင်းသည် ဆီးဂိမ်းပြိုင်ပွဲအုပ်စု(က) တွင် အိမ်ရှင် ဗီယက်နမ်၊ အင်ဒိုနီးရှား၊ ဖိလစ်ပိုင်၊ အရှေ့တီမော အသင်းများနှင့်တစ်အုပ်စုတည်းကျရောက်လျက်ရှိသည်။ ဆီးဂိမ်းစ်အဖွင့်ပွဲစဉ်အဖြစ် မေ ၈ရက်တွင် အရှေ့တီမောအသင်းနှင့် လည်းကောင်း၊ မေ ၁၀ရက်တွင် ဖိလစ်ပိုင်အသင်းနှင့် လည်းကောင်း၊ မေ ၁၃ရက်တွင် အိမ်ရှင်ဗီယက်နမ်အသင်းနှင့် လည်းကောင်း၊ အုပ်စုနောက်ဆုံးပွဲစဉ်အဖြစ် မေ ၁၅ရက်တွင် အင်ဒိုနီးရှားအသင်းနှင့် လည်းကောင်း အသီးသီးယှဉ်ပြိုင်ကစားရမည် ဖြစ်သည်။

အုပ်ချုပ်/နည်းပြအဖွဲ့

အသင်းအုပ်ချုပ်သူ- ဦးစည်သူ၀င်း
နည်းပြချုပ်- ဗယ်လီဇာပိုပေါ့ဗ်
လက်ထောက်နည်းပြ- ဦးဇော်ဝင်းထွန်း
လက်ထောက်နည်းပြ- ဦးအောင်အောင်ထွန်း
ဂိုးနည်းပြ- ဦးအောင်ကျော်ကျော်
အသင်းဆရာဝန်- ဒေါက်တာဖြိုးမင်းဦး
ကြံခိုင်ရေးနည်းပြ -ဦးထွန်းဇော်
အကြောကျွမ်းကျင်- ဦးသူရတိုး
ဝတ်စုံတာဝန်ခံ- ဦးချမ်းဝေစိုး

ပဏာမလက်ရွေးစင်လူစာရင်း

ဂိုး– ပြည့်ဖြိုးသူ၊ သူရ‌ကျော်၊ ပြည့်ဖြိုးအောင်၊ အောင်ကိုလတ်

နောက်တန်း – သက်ဟိန်းစိုး၊ စိုးမိုးကျော်၊ ဟိန်းဇေယျာလင်း၊ ၀င်းမိုးကျော်၊ ရဲမင်းသူ၊ သက်ပိုင်‌ထွေး၊ အောင်၀ဏ္ဏစိုး၊ ရဲလင်းထက်၊ နောင်နောင်စိုး

ကွင်းလယ်- ဇော်ဝင်းသိန်း၊ လွင်မိုးအောင်၊ လင်းထက်စိုး၊ ဝေလင်းအောင်၊ ရန်ကျော်စိုး၊ အောင်နိုင်၀င်း၊ ဟိန်းထက်အောင်

ရှေ့တန်း– ရဲရင့်အောင်၊ ထက်ဖြိုးဝေ၊ ၀င်းနိုင်ထွန်း၊ မြတ်ကောင်းခန့်၊ ရာဇာအောင်၊ သန်းပိုင်၊ မောင်မောင်လွင်၊ အောင်ကောင်းမာန်၊ ဆမ်လန်မန်