(၃၁) ကြိမ်မြောက် အ‌ရှေ့တောင်အာရှ အားကစား ပွဲတော် (ဆီးဂိမ်းစ်) အမျိုးသမီး ဘောလုံး ပြိုင်ပွဲအတွက် ကြိုတင်ပြင်ဆင်မှုအနေဖြင့် တောင်ကိုရီးယားနိုင်ငံ Paju မြို့တွင် လေ့ကျင့်ရေးအစီအစဉ်များပြုလုပ်နေသည့် မြန်မာ့လက်ရွေးစင် အမျိုးသမီး အသင်းသည် ဒုတိယမြောက် ခြေစမ်းပွဲအဖြစ် တောင်ကိုရီးယား အမျိုးသမီးလိဂ် အသင်းတစ်သင်းဖြစ်သည့် Seoul City အသင်းနှင့် ယနေ့ ဒေသစံတော်ချိန် မွန်းလွဲ ၂ နာရီ ၃၀မိနစ်က Paju National Football Center ကွင်းတွင် ယှဉ်ပြိုင်ခဲ့ရာ (၁-၁)ဂိုးရလဒ်ဖြင့် သရေရလဒ်ထွက်ပေါ်ခဲ့သည်။

Seoul City အမျိုးသမီးအသင်းကို ၂၀၀၄ခုနှစ်က စတင်ကာ တည်ထောင်ခဲ့ပြီး တောင်ကိုရီးယားနိုင်ငံ Seoul မြို့အခြေစိုက် အမျိုးသမီးဘောလုံးအသင်းတစ်သင်းဖြစ်သည်။ ၂၀၂၁ ခုနှစ်ဘောလုံးရာသီတွင် အဆင့် (၄)နေရာတွင်ရပ်တည်ခဲ့ပြီး လက်ရှိအချိန်တွင်လည်း တောင်ကိုရီးယား အမျိုးသမီးလိဂ်ဘောလုံးပွဲစဉ်များကို ယှဉ်ပြိုင်နေသည့် အသင်းဖြစ်သည်။

မြန်မာအသင်း၏ ပွဲထွက်လူစာရင်းအဖြစ် မြန်မာ့လက်ရွေးစင်အမျိုးသမီးအသင်းမှ ဇူးလတ်နဒီ (ဂိုး)၊ ခင်သန်းဝေ၊ဇွန်ယုယဦး၊အေးအေးမိုး၊ခိုင်သဇင်၊ခင်မိုမိုထွန်း၊နော်ထက်ထက်ဝေ၊ခင်မာလာထွန်း၊စန်းသော်သော်၊လင်းမြင့်မိုရ်၊ ဂျူလိုင်ကျော်တို့ကို အသုံးပြုခဲ့သည်။

ပထမပိုင်း ၁၅မိနစ်တွင် ခင်မိုမိုထွန်း၏ ပေးပို့မှုမှ စန်းသော်သော် Seoul City အသင်းနောက်ခံလူများကို ကျော်ဖြတ်ပြီး မြန်မာအသင်းအတွက် ဦးဆောင်ဂိုးကို သွင်းယူပေးခဲ့သည်။ ပထမပိုင်း ပြီးဆုံးကာနီး ၄၂မိနစ်တွင် ပင်နယ်တီဧရိယာအတွင်း နောက်ခံလူ အေးအေးမိုး လက်နှင့်ဘောလုံး ထိသည်ဟုသတ်မှတ်ပြီး Seoul City အသင်း ပင်နယ်တီကန်ခွင့်ရရှိခဲ့ရာ Seoul City အသင်း ကွင်းလယ်လူ Cho Ha-neul က အမှားအယွင်းမရှိကန်သွင်းခဲ့ပြီး (၁-၁) ဂိုးဖြင့် ပထမပိုင်း ပြီးဆုံးခဲ့သည်။

ဒုတိယပိုင်းတွင် လင်းမြင့်မိုရ်အစား မြတ်နိုးခင် ၊ ခင်သန်းဝေ အစား ခင်မျိုးဝင်း ၊ အေးအေးမိုး အစား နန့်ဇူဇူးထက်၊ စန်းသော်သော်အစား အစား ခင်မိုးဝေ၊ ခိုင်သဇင်အစား ဖြူဖြူဝင်း၊ ခင်မာလာထွန်း အစား သင်းသင်းယု တို့ကို လဲလှယ် အသုံးပြုခဲ့သည်။
ဒုတိယပိုင်းတွင် တစ်ဘက်နှင့်တစ်ဘက် အပြန်အလှန် ကစားနိုင်ခဲ့ပြီး ဂိုးထပ်မံသွင်းယူနိုင်ခြင်းမရှိသည့်အတွက် ပွဲပြီးဆုံးချိန်တွင် (၁-၁)ဂိုးဖြင့် သရေရလဒ်ထွက်ပေါ်ခဲ့သည်။

မြန်မာ့လက်ရွေးစင်အမျိုးသမီးအသင်း၏ တောင်ကိုရီးယားခြေစမ်းခရီးစဉ် နောက်ဆုံးခြေစမ်းပွဲအဖြစ် မေလ ၃ရက် တွင် တောင်ကိုရီးယား ယူ-၂၀ အမျိုးသမီးအသင်းဖြင့် ယှဉ်ပြိုင်ကစားမည်ဖြစ်သည်။