၃၁ ကြိမ်မြောက် အရှေ့တောင်အာရှ အားကစား ပြိုင်ပွဲဝင်ရောက်ယှဉ်ပြိုင်မည့် မြန်မာ့လက်ရွေးစင် အမျိုးသမီးဖူဆယ်အသင်းသည် ထိုင်းနိုင်ငံတွင် လေ့ကျင့်ပြင်ဆင်မှုများ ပြုလုပ်နေပြီး မေ ၆ ရက်၊ နံနက်ပိုင်းက Kasem Bundit University အမျိုးသမီးဖူဆယ်အသင်းနှင့်ခြေစမ်းပွဲ ယှဉ်ပြိုင်ကစားခဲ့ရာ (၁-၀) ဂိုးဖြင့် အနိုင်ရရှိခဲ့သည်။

ပွဲချိန်ပထမပိုင်းတွင် ဂိုးမရှိသရေကျနေပြီ မြန်မာအသင်းအတွက် တစ်လုံးတည်းသော အနိုင်ဂိုးကို ပွဲချိန်ဒုတိယပိုင်းတွင် နန့်မေသဇင်က သွင်းယူပေးခဲ့ခြင်းဖြစ်သည်။

မြန်မာ့လက်ရွေးစင် အမျိုးသမီးဖူဆယ်အသင်းသည် ဧပြီ ၂၉ ရက် နံနက်ပိုင်းကလည်း ထိုင်းကလပ် Nonthaburi အမျိုးသမီးဖူဆယ်အသင်းနှင့် ခြေစမ်းပွဲ ယှဉ်ပြိုင်ကစားရာ (၅-၃) ဂိုးဖြင့် အနိုင်ရရှိခဲ့သည်။

မြန်မာ့လက်ရွေးစင် အမျိုးသမီးဖူဆယ်အသင်းသည် အရှေ့တောင်အာရှ အားကစားပြိုင်ပွဲမတိုင်မီ NSDF ဖိတ်ခေါပြိုင်ပွဲ ဝင်ရောက်ယှဉ်ပြိုင်ခဲ့ပြီး ထိုင်းနိုင်ငံတွင် ဆက်လက်နေထိုင်ကာ ကစားသမား ၂၂ဦးဖြင့် လေ့ကျင့်မှုများ ပြုလုပ်နေရာ ဧပြီ ၂၉ ရက်က အပြီးသတ် ကစားသမား ၁၆ဦးကို ရွေးချယ်ခဲ့သည်။

မြန်မာ့လက်ရွေးစင် အမျိုးသမီးဖူဆယ်အသင်းသည် ထိုင်းနိုင်ငံတွင် လေ့ကျင့်မှုများဆက်လက်ပြုလုပ်သွားမည်ဖြစ်ပြီး မေ ၁၂ရက်တွင် ထိုင်းနိုင်ငံမှတစ်ဆင့် အရှေ့တောင်အာရှ အားကစားပြိုင်ပွဲ ကျင်းပရာ ဗီယက်နမ်နိုင်ငံသို့ ထွက်ခွာမည်ဖြစ်သည်။

မြန်မာ့လက်ရွေးစင် အမျိုးသမီးဖူဆယ်အသင်းသည် အရှေ့တောင်အာရှ အားကစားပြိုင်ပွဲတွင် မေ ၁၅ရက်တွင် ဗီယက်နမ်အသင်းနှင့် လည်းကောင်း၊ မေ ၁၇ရက်တွင် ထိုင်းအသင်းနှင့်လည်းကောင်း၊ မေ၁၉ရက်တွင် မလေးရှားအသင်းနှင့် လည်းကောင်း ကစားရမည် ဖြစ်သည်။