(၃၁)ကြိမ်မြောက် ဆီးဂိမ်းပြိုင်ပွဲ အမျိုးသားဖူဆယ်ပြိုင်ပွဲ၏ ပွဲကြို သတင်းစာရှင်းလင်းပွဲအခမ်းအနားကို ဗီယက်နမ်နိုင်ငံ ဟာနမ်မြို့ရှိ Moung Thanh Luxury ဟိုတယ်တွင် ကျင်းပခဲ့သည်။

ထိုသတင်းစာရှင်းလင်းပွဲသို့ မြန်မာ့လက်ရွေးစင် ဖူဆယ်အသင်းနည်းပြချုပ် Mr. Bunlert Cheowarang နှင့် အသင်းခေါင်းဆောင် မျိုးမြင့်စိုးတို့က တက်ရောက်ဖြေကြားပေးခဲ့သည်။

မြန်မာ့လက်ရွေးစင် ဖူဆယ် အသင်းနည်းပြချုပ် Mr. Bunlert Cheowarang က ” ကျွန်တော်တို့ အာဆီယံ ပြိုင်ပွဲမှာ တွေ့ခဲ့တဲ့ အမှားတွေကို ပြင်ဆင်ပြီး ဆီးဂိမ်းပြိုင်ပွဲကို လာရောက်ခဲ့တာပါ။ ကစားသမားတွေလည်းသူတို့ရဲ့ အမှားတွေကို အကောင်းဆုံး ပြင်ဆင်လာခဲ့ပြီး ဒီပြိုင်ပွဲမှာ ရလဒ်ကောင်းတွေ ရရှိဖို့ အကောင်းဆုံးကြိုးစားသွားမှာပါ”ဟု ပြောကြားခဲ့သည်။

ထို့နောက် အိမ်ရှင်ဗီယက်နမ် အသင်းနှင့် ပတ်သက်၍ မေးမြန်းချက်များကို “ဗီယက်နမ်အသင်းက ကောင်းမွန်တဲ့ အသင်းတစ်သင်းဖြစ်ပါတယ်။ ဒါပေမဲ့ အာဆီယံ ပြိုင်ပွဲမှာ နှစ်ကြိမ်စလုံးကို ပွဲချိန်အတွင်း သရေ ကစားနိုင်ခဲ့တယ်။ အခုလည်း အကောင်းဆုံးပြင်ဆင်လာခဲ့တာကြောင့် ဗီယက်နမ်အသင်းနဲ့ ပွဲစဉ်မှာ ရလဒ်ကောင်းရမယ်လို့ ယုံကြည်ပါတယ်”ဟု Mr. Bunlert Cheowarang က ဖြေကြားခဲ့သည်။

ထို့အပြင် အသင်းခေါင်းဆောင် မျိုးမြင့်စိုးကလည်း “ဗီယက်နမ် အသင်းက တိုက်စစ်ကစားပုံရော ခံစစ် ကစားပုံပါ အရမ်းကောင်းတဲ့ အသင်းပါ။ ဗီယက်နမ် အသင်းနဲ့ကစားခဲ့ရတာ ခက်ခဲတယ်ဆိုပေမဲ့ ကျွန်တော်တို့ သူတို့နဲ့ ကစားမယ့်ပွဲစဉ်ကို စိုးရိမ်စိတ် မရှိပဲ အကောင်းဆုံး ယှဉ်ပြိုင်သွားမှာပါ”ဟု မီဒီယာများ၏ မေးမြန်းမှုများကို ပြန်လည်ဖြေကြားခဲ့သည်။

ထို့နောက် မြန်မာ့လက်ရွေးစင် ဖူဆယ် အသင်းသည် (၃၁)ကြိမ်မြောက် အရှေ့တောင်အာရှ ဖူဆယ်ပြိုင်ပွဲအတွက် Official Training အဖြစ် ပြိုင်ပွဲကျင်းပရာ Hà Nam Gymnasium အားကစားခန်းမတွင် လေ့ကျင့်မှုများ ပြုလုပ်ခဲ့သည်။

မြန်မာ့လက်ရွေးစင် ဖူဆယ် အမျိုးသား အသင်းသည် မေလ ၁၄ ရက်တွင် အင်ဒိုနီးရှားအသင်းနှင့် စတင်ယှဉ်ပြိုင် ကစားရမည် ဖြစ်သည်။ ထို့နောက် မေ ၁၆ ရက်တွင် ထိုင်းအသင်းနှင့် လည်းကောင်းမေ ၁၈ ရက်တွင် အိမ်ရှင်ဗီယက်နမ်အသင်းနှင့်လည်းကောင်း၊ မေ ၂၀ ရက်တွက် မလေးရှားအသင်းနှင့် လည်း‌ကောင်း အသီးသီးယှဉ်ပြိုင် ကစားရမည် ဖြစ်သည်။