လာမည့် ၂၀၂၃ခုနှစ်အတွင်း ဘာရိန်းနိုင်ငံတွင် အိမ်ရှင်အဖြစ်လက်ခံကျင်းပမည့် အာရှယူ-၁၇ ချန်ပီယံရှစ်ပြိုင်ပွဲအတွက် ခြေစစ်ပွဲစဉ်အုပ်စုမဲခွဲပွဲကို မေ ၂၄ရက်က ကျင်းပခဲ့ရာ မြန်မာအသင်းက အုပ်စု(ဃ) တွင် ဆော်ဒီအာရေဗျ၊ အိန္ဒိယ၊ မော်လ်ဒိုက်၊ ကူဝိတ်အသင်းများနှင့် တစ်အုပ်စုတည်း ကျရောက်ခဲ့သည်။

ယင်းအာရှခြေစစ်ပွဲကို လာမည့် အောက်တိုဘာ ၁ရက်မှ ၉ရက် အထိကျင်းပသွားမည်ဖြစ်ပြီး အာရှတိုက်အတွင်းမှ အသက် (၁၇)နှစ်အောက်လက်ရွေးစင် အသင်း ၄၄သင်းက အုပ်စု ၁၀စု ခွဲ၍ ယှဉ်ပြိုင်ကစားကြမည်ဖြစ်သည်။ အုပ်စု (၁၀) စုမှ အုပ်စုဗိုလ် ၁၀သင်းနှင့် အကောင်းဆုံး အုပ်စုဒုတိယ ၅သင်းတို့သည် ခြေစစ်ပွဲအောင်မြင်မည် ဖြစ်သည်။ လက်ရှိချန်ပီယံဂျပန် အသင်းသည် ပြိုင်ပွဲသမိုင်းတစ်လျှောက် သုံးကြိမ်အ ထိချန်ပီယံဖြစ်ထားပြီး အအောင်မြင်ဆုံးအသင်းအဖြစ် ရပ်တည်နေသည်။

မြန်မာအသင်းပါဝင်သည့် အုပ်စု (ဃ)ကို ဆော်ဒီအာရေဗျနိုင်ငံတွင် အိမ်ရှင်အဖြစ်လက်ခံကျင်းပမည်ဖြစ်ပြီးဆော်ဒီအာရေဗျအသင်းသည် ချန်ပီယံဆုနှစ်ကြိမ်အထိရယူထားပြီး အအောင်မြင်ဆုံးအသင်းစာရင်းတွင် တစ်သင်းအပါအဝင်ဖြစ်သည်။

အာရှယူ-၁၇ ချန်ပီယံရှစ် ခြေစစ်ပွဲစဉ်ကိုဝင်ရောက်ယှဉ်ပြိုင်ရန်အတွက် မြန်မာ့လက်ရွေးစင်ယူ-၁၆အသင်းကို မေလအတွင်း စတင်ဖွဲ့စည်းခဲ့ပြီး လာမည့် ဩဂုတ်လအတွင်း အင်ဒိုနီးရှားနိုင်ငံတွင် ကျင်းပမည့် ယူ-၁၆ အာဆီယံချန်ပီယံရှစ်ပြိုင်ပွဲကို ဝင်ရောက်ယှဉ်ပြိုင်စေမည်ဖြစ် သည်။

ထို့အပြင် ၂၀၂၃ ခုနှစ်အတွင်း ဉဇဘက်ကစ္စတန်နိုင်ငံတွင် ကျင်းပပြုလုပ်မည့် အာရှ ယူ-၂၀ ချန်ပီယံရှစ်ပြိုင်ပွဲအတွက် ခြေစစ်ပွဲစဉ်အုပ်စုမဲခွဲပွဲကို မေ ၂၄ရက်က ကျင်းပခဲ့ရာ မြန်မာအသင်းက အုပ်စု(က)တွင် ဆော်ဒီအာရေဗျ၊ တရုတ်၊ မော်လ်ဒိုက်၊ ဉဇဘက်ကစ္စတန်အသင်းများနှင့် တစ်အုပ်စုတည်း ကျရောက်ခဲ့သည်။

အာရှ ယူ-၂၀ ချန်ပီယံရှစ်ပြိုင်ပွဲ ခြေစစ်ပွဲစဉ်များကို စက်တင်ဘာ ၁၀ရက်မှ ၁၈ ရက်အထိ ကျင်းပပြုလုပ်သွားမည်ဖြစ်ပြီး အသင်း ၄၄ သင်းက အုပ်စု ၁၀စုခွဲ၍ ယှဉ်ပြိုင်မည်ဖြစ်သည်။ အုပ်စု (၁၀) စုမှ အုပ်စုဗိုလ် ၁၀သင်းနှင့် အကောင်းဆုံး အုပ်စုဒုတိယ ၅သင်းတို့သည် ခြေစစ်ပွဲအောင်မြင်မည် ဖြစ်သည်။

မြန်မာအသင်းပါဝင်သည့် အုပ်စု (က)ကို ၂၀၁၈က ချန်ပီယံဆုရရှိထားသော ဆော်ဒီအာရေဗျနိုင်ငံတွင် အိမ်ရှင်အဖြစ်လက်ခံကျင်းပမည်ဖြစ်
သည်။ အုပ်စု(က)တွင် ၂၀၂၃ နောက်ဆုံးပြိုင်ပွဲကို အိမ်ရှင်အဖြစ်ကျင်းပမည့် ဉဇဘက်ကစ္စတန်အသင်းပါဝင်နေပြီး ဉဇဘက်ကစ္စတန်မှာ တိုက်ရိုက်ခြေစစ်ပွဲအောင်မြင်ထား၍ ယင်းအသင်းနှင့်ကစားသည့် ရလဒ်များကို ထည့်သွင်းတွက်ချက်မည် မဟုတ်ဘဲ ဆော်ဒီအာရေဗျ၊ တရုတ်၊ မော်လ်ဒိုက်နှင့် မြန်မာအသင်းတို့ အုပ်စုပတ်လည် ကစားသည့် ရလဒ်ကိုသာ တွက်ချက်ကာ ခြေစစ်ပွဲအောင်မည့်အသင်းကို ဆုံး ဖြတ်ပေးမည်ဖြစ်သည်။