ဖိလစ်ပိုင်နိုင်ငံက အိမ်ရှင်အဖြစ် ကျင်းပမည့် AFF Women’s Championship 2022 ၂၀၂၂ ခုနှစ် အာဆီယံ အမျိုးသမီး ချန်ပီယံရှစ်ပြိုင်ပွဲဝင် မြန်မာ့လက်ရွေးစင် အမျိုးသမီးအသင်း၏ နည်းပြချုပ်အဖြစ် အမျိုးသမီး လက်ရွေးစင်ဟောင်း ဒေါ်သက်သက်ဝင်းက တာဝန်ယူဆောင်ရွက်သွားမည် ဖြစ်သည်။

ဒေါ်သက်သက်ဝင်းသည် မြန်မာ့လက်ရွေးစင် အမျိုးသမီးအသင်းကို ဇွန်လ ၉ ရက်နေ့မှ စတင်ကာ နည်းပြချုပ် အဖြစ်ကိုင်တွယ်ခဲ့ခြင်း ဖြစ်ပြီး လက်ရှိအချိန်တွင် အသင်းအား ပဏာမ ကစားသမား (၃၅)ဦးဖြင့် စုစည်းလေ့ကျင့်လျက်ရှိသည်။ မြန်မာ့လက်ရွေးစင် အမျိုးသမီးအသင်း အနေဖြင့် အာဆီယံ အမျိုးသမီး ချန်ပီယံရှစ် ပြိုင်ပွဲကို ဇူလိုင်လ ၂ ရက်နေ့မှ ၁၇ ရက်နေ့အထိ ယှဉ်ပြိုင်ရမည်ဖြစ်ပြီး အုပ်စု(ခ)တွင် ဗီယက်နမ်၊ လာအို၊ ကမ္ဘောဒီးယား၊ အရှေ့တီမော အသင်းတို့နှင့် ယှဉ်ပြိုင်ရမည်ဖြစ်သည်။

နည်းပြချုပ် ဒေါ်သက်သက်ဝင်းသည် ၂၀၁၆ ခုနှစ် အိုလံပစ် အမျိုးသမီး ဘောလုံးပြိုင်ပွဲတွင် ယာယီနည်းပြချုပ်အဖြစ် မြန်မာ့လက်ရွေးစင် အမျိုးသမီးအသင်းကို ကိုင်တွယ်ခဲ့သည်။ ၂၀၁၈-၂၀၁၉ ခုနှစ်တွင် အသက် ၁၉နှစ်အောက် မြန်မာ့လက်ရွေးစင် အမျိုးသမီးအသင်းကို ကိုင်တွယ်ခဲ့ပြီး ခြေစစ်ပွဲ ပထမအဆင့်၊ဒုတိယအဆင့်များကို အောင်မြင်စွာကျော်ဖြတ်နိုင်ခဲ့ကာ ၂၀၁၉ အသက် ၁၉ နှစ်အောက် အာရှအမျိုးသမီး ဘောလုံးပြိုင်ပွဲသို့ ဝင်ခွင့်ရရှိအောင် စွမ်းဆောင်နိုင်ခဲ့သည်။ ဒေါ်သက်သက်ဝင်းသည် ဂျပန်နည်းပြ ကုမာဒါ၊ နယ်သာလန် နည်းပြ ရော်ဂျာ်တို့ လက်ထက်တွင်လည်း လက်ထောက်နည်းပြ အဖြစ် တာဝန်ယူခဲ့သူဖြစ်သည်။