အာဆီယံ ယူ- ၁၉ အမျိုးသား ချန်ပီယံရှစ် (AFF U-19 Boys Championship) ပြိုင်ပွဲ​ အုပ်စု(က) ဒုတိယပွဲစဉ်အဖြစ် မြန်မာယူ -၁၉ အသင်း နှင့် ထိုင်း ယူ-၁၉ အသင်းတို့ ယနေ့ (ဇူလိုင် ၄)တွင် အင်ဒိုနီးရှားနိုင်ငံ၊ဂျကာတာမြို့ရှိ Patriot Candrabhaga ကွင်း၌ ယှဉ်ပြိုင်ကစားခဲ့ရာ ထိုင်း ယူ- ၁၉ အသင်းက (၃-၀)ဂိုးဖြင့် အနိုင်ရရှိခဲ့သည်။

မြန်မာအသင်းနည်းပြချုပ် ဦးစိုးမြတ်မင်းသည် ဘရူနိုင်းကိုရင်ဆိုင်ခဲ့သည့် လူစာရင်းအတိုင်း ဟိန်းထက်စိုး(ဂိုး)၊ မျိုးမင်းဟိန်း၊ လန်းဆန်းအောင်၊ လင်းလင်းထွန်း၊ အာကာကျော်၊ ဇော်ဝင်းသိန်း၊ချစ်အေး၊ မိုးဆွေ၊ လမင်းထွေး၊ ထွန်းထွန်းသိန်း၊ ဉက္ကာနိုင်တို့ဖြင့် ပွဲထွက်ခဲ့သည်။ ထိုင်းအသင်းတွင်လည်း လူစုံပါဝင်ခဲ့ပြီး ပွဲချိန် (၆) မိနစ်တွင် သာဝက်ချိုင်းက ဦးဆောင်ဂိုး သွင်းယူခဲ့သည်။

မြန်မာအသင်းအနေဖြင့် ဂိုးသွင်းခွင့်များရရှိခဲ့သော်လည်း ချစ်အေး ကန်သွင်းချက်ကို ထိုင်းဂိုးသမား ကာကွယ်နိုင်ခြင်း၊ ဇော်ဝင်းသိန်း၏ ဖရီးကစ် ကန်သွင်းချက် တိုင်ထိထွက်ခြင်းတို့ကြောင့် ချေပဂိုးရရှိမည့် အခွင့်အရေး ဆုံးရူံးခဲ့သည်။
ပွဲချိန် (၂၄)မိနစ်နှင့် (၃၁) မိနစ်တို့တွင် နာတာကစ်က ထိုင်းအသင်းအတွက် (၂) ဂိုးဆက် သွင်းယူခဲ့သောကြောင့် ပထမပိုင်းအပြီးတွင် ထိုင်းအသင်းက (၃) ဂိုးပြတ် အနိုင်ရလဒ်ဖြင့် ပွဲကို ဉီးဆောင်ကစားခဲ့သည်။
ဒုတိယပိုင်းတွင် မြန်မာအသင်းသည် ကစားသမား အပြောင်းအလဲပြုလုပ်ခဲ့သောကြောင့် ကစားပုံ ပိုကောင်းလာပြီး ဖိအားပေးကစားခဲ့သော်
လည်း ထိုင်းအသင်းက ခံစစ်ဦးစားပေး ကစားခဲ့ခြင်းကြောင့် ချေပဂိုးရရှိခြင်းမရှိဘဲ ရူံးနိမ့်သွားခြင်းဖြစ်သည်။
ပြိုင်ပွဲအပြီး ပြုလုပ်သည့် မီဒီယာများနှင့် တွေ့ဆုံမှုတွင် မြန်မာအသင်းနည်းပြချုပ် ဦးစိုးမြတ်မင်းက ” ဒီပွဲမှာ အနိုင်ရရှိအောင် ကစားသွားတဲ့
ထိုင်းအသင်းကို ချီးကျူးပါတယ်။ ကျွန်တော်တို့အသင်းအနေနဲ့ ပထမပိုင်းက အမှားတွေကို ပြင်ပြီး ဒုတိယပိုင်းမှာ ပုံစံကောင်းနဲ့ကစားနိုင်ခဲ့
ပါတယ်။ ပထမပိုင်းကနဲ့ မတူတော့တဲ့ ပုံစံမျိုးနဲ့ ကစားနိုင်ခဲ့ပြီး ဂိုးရဖို့ အခွင့်အရေးကောင်းတွေကိုလည်း ဖန်တီးနိုင်ခဲ့ပါတယ်။ ဒီပွဲက အမှား
တွေကို ပြင်ပြီး လာမယ့်ပွဲတွေမှာ အကောင်းဆုံး ကစားနိုင်ဖို့ ပြင်ဆင်သွားမှာဖြစ်ပါတယ်” ဟု ပြောကြားခဲ့သည်။
မြန်မာ ယူ- ၁၉ အသင်းသည် ဇူလိုင် ၆ ရက်တွင် ဖိလစ်ပိုင်၊ ဇူလိုင် ၈ ရက်တွင် ဗီယက်နမ်၊ ဇူလိုင် ၁၀ ရက်တွင် အင်ဒိုနီးရှားအသင်းတို့နှင့် ဆက်လက်ယှဉ်ပြိုင်ကစားရမည်ဖြစ်သည်။