မြန်မာနိုင်ငံ ဘောလုံးအဖွဲ့ချုပ်(MFF) ဒိုင်ကော်မတီနှင့် ဒိုင်လုပ်ငန်းဌာနတို့ ပူးပေါင်းကျင်းပသည့် ဒိုင်ကြီးကြပ်၊ ကွင်းလယ်ဒိုင်လူကြီးများနှင့် အကူဒိုင်လူကြီးများပါဝင်သည့် အလုပ်ရုံဆွေးနွေးပွဲ (Group 3) ဖွင့်ပွဲ အခမ်းအနားကို ဩဂုတ် ၉ ရက် နံနက်ပိုင်းက သုဝဏ္ဏကွင်းအတွင်းရှိ သတင်းစာ ရှင်းလင်းပွဲ ခန်းမတွင် ကျင်းပခဲ့သည်။

ယင်းအလုပ်ရုံဆွေးနွေးပွဲ ဖွင့်ပွဲအခမ်းအနားသို့ မြန်မာနိုင်ငံဘောလုံးအဖွဲ့ချုပ် ဒိုင်ကော်မတီ ဥက္ကဋ္ဌ ဦးထွန်းလှအောင်၊ ဘောလုံးအဖွဲ့ချုပ် နည်းစနစ်ဒါရိုက်တာ ဦးတင်မြင့်အောင်နှင့် တာဝန်ရှိသူများ၊ ဒိုင်ကြီးကြပ်၊ ဒိုင်လူကြီးများနှင့် အကူဒိုင်လူကြီးများ တက်ရောက်ခဲ့ကြသည်။

အခမ်းအနားတွင် ဒိုင်ကော်မတီ ဥက္ကဋ္ဌ ဦးထွန်းလှအောင်နှင့် ဦးတင်မြင့်အောင်တို့က သင်တန်းအဖွင့် အမှာစကား အသီးသီး ပြောကြားခဲ့ပြီး အမှတ်တရ ဓါတ်ပုံရိုက်ကူးကာ အခမ်းအနားကိုဖွင့်လှစ်ခဲ့သည်။

ဩဂုတ် ၉ မှ ၁၁ ရက်အထိပြုလုပ်မည့် အလုပ်ရုံဆွေးနွေးပွဲသို့ ဒိုင်ကြီးကြပ် (၃)ဦး၊ ကွင်းလယ်ဒိုင်လူကြီး(၁၂)ဦးနှင့် အကူဒိုင်လူကြီး (၁၁)ဦး စုစုပေါင်း (၂၆)ဦးပါဝင်ကြမည် ဖြစ်သည်။