မြန်မာနိုင်ငံ ဘောလုံး အဖွဲ့ချုပ်သည် အာရှဘောလုံးအဖွဲ့ချုပ် လူငယ်ဘောလုံး ဖွံ့ဖြိုးရေး အစီအစဉ်များအတိုင်း MFF Grassroots Football Festival 2022 လူငယ်ဘောလုံးပွဲတော်ကို ယနေ့ အောက်တိုဘာ ၂၃ ရက်၊ မနက် (၇)နာရီအချိန်က သုဝဏ္ဏ အားကစားကွင်းတွင် ကျင်းပ ပြုလုပ်ခဲ့သည်။ အဆိုပါ အခမ်းအနားသို့ အားကစားနှင့်ကာယပညာ ဦးစီးဌာန ဒုတိယ ညွှန်ကြားရေးမှူးချုပ်(၃) ဦးကျော်စိုးမိုး၊ ရန်ကုန်တိုင်းဒေသကြီး ပညာရေးမှူးရုံး ဒုတိယ ညွှန်ကြားရေးမှူးချုပ် ဦးကျော်မိုးထွန်း၊ ရန်ကုန်တိုင်းဒေသကြီး အားကစားနှင့် ကာယပညာ ဦးစီးဌာန ညွှန်ကြားရေးမှူး ဦးအောင်မိုး၊ အား/ကာ သိပ္ပံ(ရန်ကုန်) ကျောင်းအုပ်ကြီး ဦးအောင်နိုင်ဆွေ၊ မြန်မာနိုင်ငံဘောလုံး အဖွဲ့ချုပ် အလုပ်အမှုဆောင် အဖွဲ့ဝင်နှင့် လူငယ်ပြိုင်ပွဲ ကျင်းပရေး ကော်မတီ ဥက္ကဋ္ဌ ဦးမင်းလှိုင်၊ အဖွဲ့ချုပ် အထွေထွေ အတွင်းရေးမှူး ဦးကိုကိုသိန်း၊ နည်းစနစ်ဒါရိုက်တာ ဦးတင်မြင့်အောင်နှင့် ဌာနတာဝန်ခံများ၊ နည်းပြဆရာများနှင့် ကျောင်းသားလူငယ်များ တက်ရောက်ခဲ့ကြသည်။

အခမ်းအနားတွင် မြန်မာနိုင်ငံဘောလုံး အဖွဲ့ချုပ် အလုပ်အမှုဆောင် အဖွဲ့ဝင်နှင့် လူငယ်ပြိုင်ပွဲ ကျင်းပရေး ကော်မတီ ဥက္ကဋ္ဌ ဦးမင်းလှိုင်က အဖွင့်အမှာစကား ပြောကြားခဲ့ပြီးနောက် အစီအစဉ်အတိုင်း အခြေခံ ဘောလုံးပညာ သင်ကြားမှုများအား နည်းပြ ဆရာ/ဆရာမ များက ကျောင်းသားလူငယ်များအား သင်ကြားပို့ချပေးခဲ့ကာ ဘောလုံးအားကစားနှင့် ပျော်ရွှင်မှုကို ဖော်ဆောင်မိတ်ဆက် ပေးခဲ့ကြသည်။ ယနေ့ ကျင်းပသည့် MFF Grassroots Football Festival 2022 သို့ ရန်ကုန်တိုင်းဒေသကြီး အတွင်းရှိ အခြေခံပညာကျောင်းများမှ ကျောင်းသားကျောင်းသူများနှင့် ဆရာ/ဆရာမ အင်အား ၃၅၀ ကျော်ပါဝင်ဆင်နွဲခဲ့ကြသည်။