မြန်မာနိုင်ငံဘောလုံးအဖွဲ့ချုပ် နည်းစနစ်ကော်မတီ အစည်းအဝေး (၁ / ၂၀၂၃) ကို ဖေဖော်ဝါရီ ၁၃ ရက် နေ့လယ်က မြန်မာနိုင်ငံဘောလုံးအဖွဲ့ချုပ် အစည်းအဝေးခန်းမတွင်ကျင်းပခဲ့ရာ နာယကများဖြစ်ကြ‌သော ဦးတင်အောင်(ဂိုး)၊ ဦးဘန်နီတင်အောင်၊ နည်းစနစ်ကော်မတီ ဥက္ကဋ္ဌ ဦးသန်းတိုးအောင်၊ ဒုတိယဥက္ကဋ္ဌ ဦးတင်မြင့်အောင်၊ မြန်မာနိုင်ငံဘောလုံးအဖွဲ့ချုပ် အထွေထွေအတွင်းရေးမှူး ဦးကိုကိုသိန်းနှင့် နည်းစနစ်ကော်မတီ အဖွဲ့ဝင်များ တက်ရောက်ခဲ့ကြပါသည်။

နည်းစနစ်ကော်မတီဥက္ကဋ္ဌ ဦးသန်းတိုးအောင်မှ အဖွင့်အမှာစကားပြောကြားရာတွင် ၂၀၂၃ တွင် ပထမဆုံးအကြိမ် ပြုလုပ်သည့်အစည်းအဝေးကို အဖွဲ့ဝင်များ စုံညီစွာတက်ရောက်ပေး၍ ကျေးဇူးတင်ကြောင်း၊ မိမိတို့ ကော်မတီကို အားလုံးစုံညီစွာ ပါဝင်နိုင်ရေး ဖွဲ့စည်းထားခြင်းဖြစ်သောကြောင့် ကလပ်အသင်းနည်းပြများပါ ပါဝင်သင့်ကြောင်း၊ သက်တမ်းအလိုက် လစ်လပ်နေသည့် လက်ရွေးစင်အသင်းများ၏ နည်းပြသစ်များ ခန့်အပ်ရေးတွင် ဝိုင်းဝန်းဆွေးနွေး အကြံပေးစေလိုကြောင်း စသည်ဖြင့် ထည့်သွင်းပြောကြားခဲ့ပါသည်။

ထို့နောက် အထွေထွေအတွင်းရေးမှူးဦးကိုကိုသိန်း မှ ယခုအစည်းအဝေးကို အချိန်ပေးတက်ရောက်ပေး၍ အဖွဲ့ချုပ် ကိုယ်စားကျေးဇူး တင်ကြောင်း၊ပြီးခဲ့သည့် ၂၀၂၂ တွင် နည်းစနစ်ကော်မတီ အစည်းအဝေးကို ၄ ကြိမ် ပြုလုပ်ခဲ့ကြောင်း၊ အာဆီယံချန်ပီယံရှစ်ပြိုင်ပွဲကို အိမ်ကွင်းတွင် အောင်မြင်စွာ ကျင်းပနိုင်ခဲ့ကြောင်း၊ သို့သော် မြန်မာ့လက်ရွေးစင်အသင်းမှာ အုပ်စုအဆင့်ဖြင့်သာ ကျေနပ်ခဲ့ရကြောင်း ပြောကြားခဲ့ပြီး မြန်မာ့လက်ရွေးစင် အမျိုးသားအသင်းနည်းပြချုပ် အန်တိုနီဟေးနှင့် မြန်မာ့လက်ရွေးစင် ယူ- ၂၃ အမျိုးသားအသင်းနည်းပြချုပ် ပိုပေါ့ဗ်တို့ အား နည်းစနစ်ကော်မတီ၏ ထောက်ခံမှုနှင့် လမ်းခွဲခဲ့သည့်အကြောင်း၊ မြန်မာ့လက်ရွေးစင် အမျိုးသမီးအသင်းနည်းပြချုပ်အဖြစ် ဒေါ်သက်သက်ဝင်းနှင့် မြန်မာ့လက်ရွေးစင် ယူ- ၂၀ အမျိုးသမီးအသင်းနည်းပြချုပ်အဖြစ် ဒေါ်စန်းစန်းသိန်းတို့အား တာဝန်ပေးခန့်အပ်သည့် အကြောင်း၊ ယူ -၁၄ လိဂ်ပြိုင်ပွဲကို ပြုလုပ်ရန် အဆင်သင့်ဖြစ်နေကြောင်း၊ ပရိုလိုင်စင်သင်တန်းကို ယခုနှစ်အတွင်း မြန်မာနိုင်ငံတွင် ဖွင့်လှစ်နိုင်ရေး စီစဉ်ဆောင်ရွက်နေပြီး လိုအပ်သည်များကို အဖွဲ့ချုပ်အနေဖြင့်ကူညီသွားမည်ဖြစ်၍ လူငယ်နည်းပြများ တက်ရောက်စေလိုကြောင်း၊ မြန်မာ့လက်ရွေးစင် အမျိုးသားအသင်းအနေဖြင့် လာမည့် မတ်လအတွင်း အိန္ဒိယနိုင်ငံတွင် ခြေစမ်းပွဲကစားရန် ရှိကြောင်း၊ လစ်လပ်နေသည့် နည်းပြနေရာများ ခန့်အပ်နိုင်ရေးအတွက် ဆွေးနွေး အကြံပေးစေလိုကြောင်း၊ စပွန်ဆာရရှိရေးအတွက် ကြိုးစားဆောင်ရွက်နေကြောင်း စသည်များကို တက်ရောက်လာသော နည်းစနစ်ကော်မတီ အဖွဲ့ဝင်များကို ရှင်းလင်းတင်ပြခဲ့ပါသည်။

ယင်းနောက် ကော်မတီ အဖွဲ့ဝင်များက မြန်မာ့လက်ရွေးစင် အမျိုးသားအသင်းနည်းပြချုပ်၊ မြန်မာ့လက်ရွေးစင် ယူ- ၂၃ အမျိုးသားအသင်း နည်းပြချုပ်၊ မြန်မာ့လက်ရွေးစင် ယူ- ၁၉ အမျိုးသားအသင်းနည်းပြချုပ်၊ မြန်မာ့လက်ရွေးစင် ယူ- ၁၆ အမျိုးသမီးအသင်းနည်းပြချုပ်နေရာ များ ခန့်အပ်ရေး၊ မြန်မာ့လက်ရွေးစင် ယူ- ၁၉ အမျိုးသားအသင်းကို ဖွဲ့စည်းပြီး လိဂ် -၂ ပြိုင်ပွဲဝင်ရေးစသည်များကို ဆွေးနွေးခဲ့ ကြပါသည်။ ထို့နောက် တက်ရောက်လာသော နည်းစနစ်ကော်မတီအဖွဲ့ဝင်များမှ အပြန်အလှန်ဆွေးနွေးခဲ့ကြပြီး အစည်းအဝေးကို ရုပ်သိမ်းခဲ့ပါသည်။