မြန်မာနိုင်ငံဘောလုံးအဖွဲ့ချုပ်တွင် အမျိုးသမီး ဒိုင်လူကြီးများ အဖြစ် တာဝန်ထမ်းဆောင်နေသော ဒေါ်ဇင်မာဦးနှင့် ဒေါ်မေသက်ဖြူတို့သည် အာရှဘောလုံးအဖွဲ့ချုပ်၏ AFC Elite Referee အဖြစ် အပြည်ပြည်ဆိုင်ရာ ပြိုင်ပွဲများတွင် တာဝန်ထမ်းဆောင်ရမည် ဖြစ်သည်။

ဒေါ်ဇင်မာဦးနှင့် ဒေါ်မေသက်ဖြူတို့သည် ဇန်နဝါရီ ၁၆ ရက်မှ ၁၉ ရက်အထိ မလေးရှားနိုင်ငံ ကွာလမ်လာပူမြို့တွင် ဖွင့်လှစ်ခဲ့သော AFC Referee & Assistant Referee Selection Course 2023 ကို တက်ရောက်ခဲ့ပြီး သင်တန်းဆင်းစာမေးပွဲ ဖြေဆိုအောင်မြင်ခဲ့သည့် အတွက် AFC Elite Referee အဖြစ် ရွေးချယ်ခံရခြင်းဖြစ်သည်။

ဒေါ်ဇင်မာဦးသည် ကွင်းလယ်ဒိုင်လူကြီးအဖြစ် တာဝန်ယူဆောင်ရွက်နေသူ ဖြစ်ပြီး ဒေါ်မေသက်ဖြူသည် အကူဒိုင်လူကြီးအဖြစ် ဆောင်ရွက်နေသူဖြစ်သည်။

ဒေါ်ဇင်မာဦးနှင့် ဒေါ်မေသက်ဖြူတို့ AFC Elite Referee ဖြစ်လာခဲ့ပြီးနောက် မြန်မာနိုင်ငံတွင် အမျိုးသမီး AFCElite Referee ၅ ဦးအထိ ရှိလာခဲ့ပြီ ဖြစ်သည်။ ကွင်းလယ်ဒိုင် ဒေါ်သိန်းသိန်းအေး၊ အကူဒိုင် ဒေါ်ဂေးပလောင်နှင့် ဒေါ်ဝင့်ဝါထွန်းတို့သည် လက်ရှိ AFC Elite Refereeများ ဖြစ်ကြသည်။