Alpine Cup 2018 ပြိုင်ပွဲ၏ ဒုတိယနေ့ ပွဲစဉ် အဖြစ် သြဂုတ်လ ၃ ရက်နေ့ ညနေ ၆ နာရီ အချိန်က မန္တလာသီရိ ကွင်းတွင်ယှဉ်ပြိုင်ကစားခဲ့သော ဘာရိန်း ယူ၂၃ အသင်းနှင့် ပွဲစဉ်တွင် မြန်မာယူ၂၃ အသင်းက ၁-၁ ဂိုးဖြင့် သရေကျခဲ့သည်။

မြန်မာယူ-၂၃ အသင်းသည် ပွဲချိန် ၁၂ မိနစ်တွင် ဘာရိန်းအသင်းကို ဦးဆောင်ဂိုး ခွင့်ပြုခဲ့ရသော်လည်းပွဲချိန်၁၉ မိနစ်တွင် ရန်နိုင်ဦးက မြန်မာအသင်းအတွက် ချေပဂိုး သွင်းယူပေးခဲ့သည်။

မြန်မာအသင်းနည်းပြ အန်တွမ်နီဟေးလ်က “ပထမပိုင်း ကစားပုံကိုတော့ ကျေနပ်ပါတယ်။ ဒုတိယပိုင်းမှာတော့ နားလည်မှုလွဲနေတာတွေကို တွေ့ရတယ်။ အဓိကက အာရှအားကစားပြိုင်ပွဲအတွက် ပြင်ဆင်တာဖြစ်တဲ့အတွက် ဘာရိန်းလို ကြံ့ခိုင်မှုကောင်းတဲ့အသင်းနဲ့ ယှဉ်ပြိုင်ခဲ့ရတာက အသင်းအတွက် အများကြီး အကျိုးရှိပါတယ်။ ကြံ့ခိုင်မှုအပိုင်းမှာတော့ လိုအပ်ချက်တွေ ရှိနေသေးတယ်” ဟု ပြောသည်။

ဘာရိန်းအသင်းနည်းပြ Mr.Samir Chammamက“မြန်မာအသင်းက ပထမပွဲစဉ်က ကစားပုံနဲ့ မတူဘူး။ ဒီနေ့ပွဲကစားပုံက ပိုပြီးကောင်းတယ်။ မြန်မာအသင်းက အောင်သူ၊ လှိုင်းဘိုဘို၊ အီစိုးတို့ရဲ့ ကစားပုံကို သဘောကျမိပါတယ်”ဟု ပြောကြားခဲ့သည်။

Alpine Cup 2018 ပြိုင်ပွဲ ဒုတိယနေ့၏ ပထမပွဲစဉ်အဖြစ် ယှဉ်ပြိုင် ကစားခဲ့ကြသော ထိုင်း ယူ၂၃ အသင်းနှင့် တောင်ကိုရီးယား ယူ၁၉ အသင်းတို့ ပွဲစဉ်တွင် တောင်ကိုရီးယားယူ-၁၉ အသင်းက ၄-၂ ဂိုးဖြင့် အနိုင်ရရှိခဲ့သည်။