မြန်မာ့လက်ရွေးစင် အသင်းသည် ကမ္ဘာ့ဘောလုံးအဖွဲ့ချုပ် (ဖီဖာ)က သတ်မှတ်ထားသည့် နိုင်ငံတကာခြေစမ်းပွဲများ ကစားမည့်ရက် (International “A” Friendly Match Day)တွင် ဟောင်ကောင် လက်ရွေးစင် အသင်းနှင့် နိုင်ငံတကာ ခြေစမ်းပွဲ (၂)ပွဲ ယှဉ်ပြိုင်ကစားမည် ဖြစ်သည်။ မြန်မာ (FIFA Ranking-158) နှင့် ဟောင်ကောင် လက်ရွေးစင် (FIFA Ranking- 147) အသင်းများသည် နိုင်ငံတကာ ခြေစမ်းပွဲရက် ဖြစ်သည့် ၂၀၂၂ ခုနှစ် စက်တင်ဘာ ၂၁ ရက်တွင် ပရိသတ်မပါဘဲ (Behind Closed Door) အဖြစ်လည်းကောင်း၊ စက်တင်ဘာ ၂၄ ရက်တွင် ပရိသတ် ဝင်ရောက်ကြည့်ရှု့ခွင့်ရှိမည့် (Open to Spectators) အဖြစ်လည်းကောင်း ခြေစမ်းပွဲများ ကစားသွားမည်ဖြစ်သည်။

မြန်မာ့လက်ရွေးစင် အသင်းသည် ဟောင်ကောင်နှင့် ခြေစမ်းပွဲများအတွက် လာမည့် စက်တင်ဘာ ၁၅ ရက်မှ စတင်ကာ သုဝဏ္ဏအားကစားကွင်းတွင် စခန်းဝင်လေ့ကျင့်မှုများ ပြုလုပ်မည်ဖြစ်ပြီး နည်းပြချုပ် အန်တွမ်နီဟေးလ် အနေဖြင့် ပဏာမ ကစားသမား စာရင်းအား မကြာမီ ထုတ်ပြန်သွားမည် ဖြစ်သည်။ မြန်မာ့ လက်ရွေးစင် အသင်းသည် ယခုနှစ် ဒီဇင်ဘာလ အတွင်း အာဆီယံ ချန်ပီယံရှစ် (AFF Mitsubishi Electronic Cup 2022) ပြိုင်ပွဲကို ဝင်ရောက်ယှဉ်ပြိုင်ရမည် ဖြစ်ပြီး အုပ်စု(ခ)တွင် ဗီယက်နမ်၊ မလေးရှား၊ စင်ကာပူ၊ လာအို အသင်းများနှင့်အတူ ကျရောက်လျက်ရှိသည်။