ဖိလစ်ပိုင်နိုင်ငံ မနီလာမြို့တွင် အိမ်ရှင်အဖြစ် လက်ခံကျင်းပမည့် အာဆီယံ အမျိုးသမီး ချန်ပီယံရှစ် ဘောလုံးပြိုင်ပွဲ အုပ်စု(ခ) ပြိုင်ပွဲဝင် အသင်းများ၏ ပွဲကြို သတင်းစာရှင်းလင်းပွဲကို ဇူလိုင်လ ၄ရက်နေ့ နေ့လယ်ပိုင်းက အွန်လိုင်းစနစ်ဖြင့် ကျင်းပပြုလုပ်ခဲ့ပြီး မြန်မာ၊ ဗီယက်နမ်၊ တီမော၊ လာအို၊ ကမ္ဘောဒီးယား အသင်းတို့မှ နည်းပြချုပ်များ တက်ရောက်ခဲ့ကြသည်။

မြန်မာအသင်းအနေဖြင့် အုပ်စု(ခ) အဖွင့်ပွဲစဉ်အဖြစ် တီမောအသင်းနှင့် ဇူလိုင်လ ၅ရက် မြန်မာစံတော်ချိန် ၂နာရီ ၃၀မိနစ်တွင် Binan အားကစားကွင်း၌ ယှဉ်ပြိုင်ကစားရမည်ဖြစ်သည်။

“ပြီးခဲ့တဲ့ ဆီးဂိမ်းစ်ပြိုင်ပွဲမှာ ကစားခဲ့တဲ့ ကစားသမား အများစုကို အခြေခံပြီး လူငယ်ကစားသမား (၆)ဦးလောက်ကို ပေါင်းစပ်ပြီး အသင်းကို ဖွဲ့စည်းထားပါတယ်။ ကစားသမားတွေကို ဆီးဂိမ်းစ် ပြိုင်ပွဲအပြီး အနားပေးခဲ့တာဖြစ်လို့ လေ့ကျင့်ပြင်ဆင်ချိန် ၂-၃ ပတ်လောက်ရခဲ့ပါတယ်။

နောက်ဆုံးပြိုင်ပွဲမှာ မမျှော်လင့်ထားတဲ့ ရလဒ်ထွက်ခဲ့တာဖြစ်လို့ ကစားသမားတွေမှာ စိတ်ပိုင်းဆိုင်ရာ အနည်းငယ်ပြဿနာ ရှိနေတယ်။ အဲ့တာကိုလည်း အကောင်းဆုံးပြန်ပြီး တည်ဆောက်ပြင်ဆင်နေပါတယ်။

ကစားသမားတွေ အနေနဲ့လည်း သူတို့ဘယ်‌လောက်အရည်အချင်းရှိတယ်ဆိုတာ ပြသဖို့ ဒီပွဲမှာ အကောင်းဆုံး ကစားမယ်လို့ ယုံကြည်ပါတယ်။ ပြိုင်ပွဲမှာ အကောင်းဆုံး အမြင့်ဆုံးထိ ရောက်အောင် ကြိုးစားသွားပါမယ် ” ဟု မြန်မာ့လက်ရွေးစင် အမျိုးသမီးအသင်း နည်းပြချုပ် ‌ဒေါ်သက်သက်ဝင်းက ပြောကြားခဲ့သည်။