ဆော်ဒီအာရေဗျနိုင်ငံ၊ ဒါမန်းမြို့၌ စက်တင်ဘာ(၁၀) ရက်မှ (၁၈) ရက် အထိ ကျင်းပမည့် ၂၀၂၃ အာရှ ယူ-၂၀ ချန်ပီယံရှစ်ပြိုင်ပွဲ ခြေစစ်ပွဲစဉ် (2023 AFC U-20 Asian Cup Qualification) ဝင်မည့် မြန်မာ့လက်ရွေးစင် ယူ-၂၀ အသင်း လူစာရင်းကို နည်းပြချုပ် ဦးစိုးမြတ်မင်းက ထုတ်ပြန်ခဲ့သည်။

မြန်မာ ယူ-၂၀အသင်းသည် ဇူလိုင်လက ကျင်းပသည့် ၂၀၂၂ အာဆီယံ ယူ-၁၉ ချန်ပီယံရှစ်ပြိုင်ပွဲ၊ သြဂုတ်လက ကျင်းပသည့် ဗီယက်နမ် လေးနိုင်ငံ ဖိတ်ခေါ်ပြိုင်ပွဲ ဝင်ရောက်ယှဉ်ပြိုင်ပြီးနောက် ကစားသမားသစ်များ ခေါ်ယူ၍ လေ့ကျင့်ပြင်ဆင်မှုများ ပြုလုပ်ကာ အာရှ ယူ-၂၀ ချန်ပီယံရှစ်ပြိုင်ပွဲ ခြေစစ်ပွဲစဉ်ဝင်မည့် အပြီးသတ် ကစားသမား ၂၃ ဦးစာရင်းကို ထုတ်ပြန်ခဲ့ခြင်းဖြစ်သည်။

အာရှ ယူ-၂၀ ချန်ပီယံရှစ်ပြိုင်ပွဲ ခြေစစ်ပွဲစဉ်များကို အသင်းပေါင်း (၄၄)သင်းက အုပ်စု ၁၀စုခွဲ၍ ယှဉ်ပြိုင်မည်ဖြစ်ပြီး အုပ်စု (၁၀) စုမှ အုပ်စုပထမ (၁၀)သင်းနှင့် အကောင်းဆုံး အုပ်စုဒုတိယ (၅)သင်းတို့ ခြေစစ်ပွဲ အောင်မြင်မည်ဖြစ်သည်။

မြန်မာအသင်းပါဝင်သည့် အုပ်စု(က)တွင် ၂၀၂၃ အာရှ ယူ- ၂၀ နောက်ဆုံးပြိုင်ပွဲကို အိမ်ရှင်အဖြစ်ကျင်းပမည့် ဉဇဘက်ကစ္စတန် အသင်းပါဝင်နေပြီး ဉဇဘက်ကစ္စတန်မှာ တိုက်ရိုက်ခြေစစ်ပွဲအောင်မြင်ထား၍ ယင်းအသင်းနှင့်ကစားသည့် ရလဒ်များကို ထည့်သွင်း တွက်ချက်မည် မဟုတ်ဘဲ ဆော်ဒီအာရေဗျ၊ တရုတ်၊ မော်လ်ဒိုက်နှင့် မြန်မာအသင်းတို့ အုပ်စုပတ်လည် ကစားသည့် ရလဒ်ကိုသာ တွက်ချက်ကာ ခြေစစ်ပွဲအောင်မည့်အသင်းကို ဆုံးဖြတ်ပေးမည်ဖြစ်သည်။

အာရှ ယူ-၂၀ ချန်ပီယံရှစ်ပြိုင်ပွဲ ခြေစစ်ပွဲစဉ်တွင် မြန်မာအသင်းသည် စက်တင်ဘာ ၁၀ ရက် ဒေသစံတော်ချိန် ည ၉ : ၃၀ နာရီ (မြန်မာစံတော်ချိန် စက်တင်ဘာ ၁၁ ရက် နံနက် ၀၁ : ၀၀ နာရီ) တွင် တရုတ်၊ စက်တင်ဘာ ၁၂ ရက် ဒေသစံတော်ချိန် ညနေ ၆ : ၁၅ နာရီ (မြန်မာစံတော်ချိန် ည ၉ : ၄၅နာရီ) တွင် ဉဇဘက်ကစ္စတန်၊ စက်တင်ဘာ ၁၆ ရက် ဒေသစံတော်ချိန် ည ၉ : ၃၀ နာရီ (မြန်မာစံတော်ချိန် စက်တင်ဘာ ၁၇ ရက် နံနက် ၀၁ : ၀၀ နာရီ) တွင် ဆော်ဒီအာရေဗျ၊ စက်တင်ဘာ ၁၈ ရက် ဒေသစံတော်ချိန် ည ၉ : ၀၀ နာရီ (မြန်မာစံတော်ချိန် စက်တင်ဘာ ၁၉ ရက် နံနက် ၀၀ : ၃၀ နာရီ) တွင် မော်လ်ဒိုက်အသင်းတို့နှင့် ယှဉ်ပြိုင်ကစားရမည်ဖြစ်သည်။

မြန်မာ့လက်ရွေးစင် ယူ-၁၉ အသင်း အုပ်ချုပ်/နည်းပြစာရင်း
အုပ်ချုပ်သူ- ဦးရဲဝင်းအောင်
နည်းပြချုပ်- ဦးစိုးမြတ်မင်း
လက်ထောက်နည်းပြ- ဦးမင်းမင်းထွန်း၊ ဦးစထက်နိုင်ဝင်း
ဂိုးနည်းပြ- ဦးစိန်အေး
အသင်းဆရာဝန် – ဒေါက်တာ ဖြိုးမင်းဦး
အကြောကျွမ်းကျင်- ဦးလွင်ဦးကို
အသင်းမီဒီယာ – ဦးသီဟအောင်

မြန်မာ့လက်ရွေးစင် ယူ-၁၉ အသင်း ကစားသမားစာရင်း

ဂိုး- အောင်ပြည့်ဖြိုး၊ ဟိန်းထက်စိုး၊ ထက်အာကာဝင်း ။

နောက်တန်း – လန်းဆန်းအောင်၊ ထွန်းထွန်းသိန်း၊ ခန့်ဇင်ဟိန်း၊ ခွန်အောင်စိုး၊ လာဘ်ဝေဘုန်း၊ကောင်းထက်ပိုင်၊ ကိုးသန်းဇော် ၊ ဟိန်းဇော်နိုင်။

အလယ်တန်း- စောသန်းကိုသန်း၊ ချစ်အေး၊ သာယာဝင်းထက်၊ လမင်းထွေး၊ မိုးဆွေ၊ ဇော်ဝင်းသိန်း၊ ဉက္ကာနိုင်၊ အာကာကျော်၊ ရဲရင့်ဖြိုး။

ရှေ့တန်း – စွမ်းထက်၊ သန်းတိုးအောင်၊ သိန်းဇော်သီဟ။