မြန်မာနိုင်ငံ ဘောလုံးအဖွဲ့ချုပ် ဥက္ကဌ ဦးဇော်ဇော်နှင့် ဧရာဝတီဖောင်ဒေးရှင်း တာဝန်ရှိသူများသည် ငလျင်ဒဏ်ကြောင့် ထိခိုက်ပျက်စီးခဲ့သည့် မန္တလေးမြို့ မြန်မာဘောလုံးအကယ်ဒမီအား သွားရောက် ကြည့်ရှု၍ ဝန်ထမ်းများနှင့် တွေ့ဆုံခဲ့သည်။ မတ်လ ၂၈ ရက်နေ့ ငလျင်ဒဏ်ကြောင့် အကယ်ဒမီဝန်ထမ်းမိသားစုဝင် (၁)ဦး အသက်ဆုံးရှုံးခဲ့ရပြီး ကလေးငယ်တစ်ဦး ဒဏ်ရာရရှိခဲ့ရာ အဖွဲ့ချုပ် ဥက္ကဋ္ဌမှ အဆိုပါ မိသားစုဝင်များအား တွေ့ဆုံနှစ်သိမ့် အားပေးစကား ပြောကြားခဲ့ပြီး ထောက်ပံ့ကူညီငွေပေးအပ်ခဲ့သည်။

ယင်းနောက် အဖွဲ့ချုပ်ဥက္ကဋ္ဌနှင့် တာဝန်ရှိသူများသည် ငလျင်ဒဏ်ကြောင့် ပျက်စီးသွားသည့် အကယ်ဒမီ အဆောက်အဦးအား လိုက်လံစစ်ဆေး၍ ဝန်ထမ်းမိသားစုများနှင့် တွေ့ဆုံကာ ပံ့ပိုးကူညီငွေများ ဆက်လက် ပေးအပ်ခဲ့သည်။

မြန်မာ ဘောလုံးအကယ်ဒမီ (မန္တလေး)တွင် နွေရာသီပိတ်ရက်ဖြစ်နေသဖြင့် ကျောင်းသားများအကယ်ဒမီတွင် မရှိကြဘဲ နေရပ်ပြန်ကြသောကြောင့် ငလျင်လှုပ်ခတ်စဉ်အတွင်း ထိခိုက်မှု မရှိခဲ့ပေ။ ဆက်လက်၍ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌနှင့် ဧရာဝတီဖောင်ဒေးရှင်း အဖွဲ့သည် စစ်ကိုင်းနှင့် မန္တလေးရှိ ငလျင်ဘေးသင့်ရာ နေရာများတွင် ကယ်ဆယ်ရေးလုပ်ငန်းများ ကူညီခြင်းနှင့် လှူဒါန်းမှုများ သွားရောက်ဆောင်ရွက်ခဲ့သည်။