အိန္ဒိယနိုင်ငံက အိမ်ရှင်အဖြစ် ကျင်းပသည့် Hero Tri Nation International Football Tournament 2023 မြန်မာနှင့် ကာဂျစ္စတန်ပွဲစဉ်တွင် ကာဂျစ္စတန် အသင်း၏ နောက်ကျ ချေပဂိုးကြောင့် (၁-၁)ဂိုး သရေရလဒ်ဖြင့်သာ မြန်မာအသင်း ကျေနပ်ခဲ့ရသည်။ မြန်မာ့ လက်ရွေးစင် အသင်းသည် ပထမပွဲတွင် အိမ်ရှင်ကို (၁-၀)ဂိုးဖြင့် အရေးနိမ့်ခဲ့ရသောကြောင့် ယနေ့ပွဲစဉ်တွင် ရလဒ်ကောင်းမွန်စေရေး အတွက် ၄း၂း၃း၁ ကစားဟန် အတိုင်း စနစ်တကျ ကစားခဲ့သည်။ ကာဂျစ္စတန် အသင်းရော မြန်မာအသင်းပါ နှစ်သင်းစလုံး ပထမပိုင်းတွင် ဂိုးကံသွင်းများ ရရှိခဲ့သော်လည်း နောက်တန်းနှင့် ဂိုးသမားတို့ အစွမ်းပြနိုင်ခဲ့ကြသလို မြန်မာအသင်း ရရှိသည့် ပင်နယ်တီ ကံခေသွားရသောကြောင့် ပထမပိုင်း (၀-၀)ဖြင့် သရေကျနေခဲ့သည်။ ဒုတိယပိုင်းတွင် မြန်မာအသင်း ကစားပုံ ပိုမိုကောင်းမွန်လာပြီး အောင်သူ၊ မောင်မောင်လွင်၊ လွင်မိုးအောင်၊ သန်းပိုင်၊ ကျော်မင်းဦး၊ ဝေလင်းအောင် တွဲလုံးများဖြင့် ကာဂျစ္စတန်အသင်းအား ဖိအားပေးကာ အပိုင်ကန်ချက် များဖြင့် ခြိမ်းခြောက်နိုင်ခဲ့သည်။ မြန်မာနောက်တန်းမှ ဟိန်းဖြိုးဝင်း၊ ဟိန်းဇေယျာလင်း၊ သီဟထက်အောင်၊ သက်ဟိန်းစိုးနှင့် ဂိုးသမား ကျော်ဇင်ဖြိုးတို့ ကာဂျစ္စတန်အသင်း တိုက်စစ်အား စနစ်တကျ ထိန်းထားနိုင်ခဲ့သဖြင့် ပြိုင်ဘက်အသင်း ထိထိရောက်ရောက် ကန်သွင်းခွင့်မရှိခဲ့ပေ။ ပွဲချိန် ၈၂ မိနစ်တွင် အောင်သူ ပင်နယ်တီ ဧရိယာအတွင်း ပြိုင်ဘက် နောက်တန်းအား ဖြတ်ကျော်ပြီး အနီးကပ် ကန်သွင်းယူနိုင်ခဲ့သဖြင့် မြန်မာအသင်း (၁-၀)ဂိုးဖြင့် ဦးဆောင်နေခဲ့သည်။ ပွဲပြီးကာနီး အချိန်ပို ၄ မိနစ်ကုန်ဆုံး ကာနီးတွင် ကာဂျစ္စတန်အသင်း ထောင့်ကန်ဘော ရရှိခဲ့ပြီး ယင်းမှတဆင့် Zhyrgalbek Uulu Kairat ကအနီးကပ် ပိတ်သွင်းယူခဲ့သဖြင့် ပွဲအပြီးတွင် (၁-၁)ဂိုး သရေရလဒ်ဖြင့်သာ မြန်မာအသင်း ကျေနပ်ခဲ့ရသည်။

” ဒီနေ့ ကျွန်တော်တို့ နိုင်ပွဲရသင့်တဲ့ပွဲပါ။ နောက်ကျ ချေပဂိုးကြောင့် ကံခေရပြီး သရေရလဒ်ပဲ ယူနိုင်ခဲ့ပါတယ်။ ကစားသမားတွေ အားလုံးရဲ့ ကြိုးစား အားထုတ်မှုကို အသိအမှတ်ပြု ချီးကျူးပါတယ်။ ဒီလို တဆင့်ခြင်း ပိုကောင်းအောင် လုပ်သွားနိုင်တာ အားရကျေနပ်မိသလို အနာဂတ်အတွက်လည်း အားအင်ဖြစ်ရပါတယ်။ အသင်းမှာ အထူးသဖြင့် အောင်သူတို့လို ခြေစွမ်းကောင်းတဲ့ ကစားသမားတွေ ပါဝင်နေတာကလည်း အသင်းကောင်း တစ်သင်းဆိုတာကို ပြနေတာပါ။ ဒီမှာ လာကစားရတဲ့ နှစ်ပွဲစလုံး မြန်မာအသင်း စွမ်းဆောင်မှုကို ကျေနပ်ပါတယ်။” ဟု မြန်မာအသင်းနည်းပြချုပ် မိုက်ကယ်ကပြောကြားခဲ့သည်။

” အခုလို ကစားဖော်ဟောင်းတွေနဲ့ ပြန်ပြီးအတူကစားခွင့် ရခဲ့တာ ကျွန်တော်ပျော်ပါတယ်။ အားလုံး တက်ညီလက်ညီနဲ့ ကစားနိုင်ခဲ့လို့ ကျွန်တော်လည်း ဂိုးရခဲ့တယ်။ နိုင်ရမယ့်ပွဲဖြစ်ပြီး ဂိုးဖန်တီးမှုတွေ အများကြီး လုပ်နိုင်ခဲ့ပါတယ်။ အသင်းမှာ အတွေ့အကြုံရှိတဲ့ ကစားသမားတွေ အများကြီးရှိသလို လူငယ်ကစားသမား အသစ်တွေကလည်း ကြိုးစားကြတယ်။ အချင်းချင်း နားလည်မှုရှိကြလို့ ဒီနေ့ပွဲမှာ ရှေ့၊လယ်၊နောက် ဟန်ချက်ညီညီနဲ့ ကစားသွားနိုင်ခဲ့ပါတယ်” ဟု မြန်မာအသင်းအတွက် ဦးဆောင်ဂိုး သွင်းယူခဲ့သည့် အောင်သူက မီဒီယာများအား ဖြေကြားခဲ့သည်။