မိမိ၏ ကစားသမားများမှာ ပွဲချိန်အတွင်း အထူးကျိုးစား ကစားခဲ့ကြ သောကြောင့် ယခုအနိုင် သုံးမှတ်နှင့် ထိုက်တန်ကြောင်း Horizon အသင်းကို ၁-၂ ဂိုးဖြင့် အနိုင်ရခဲ့သည့် ပွဲအပြီးတွင် ဇေယျာရွှေမြေ အသင်း၏ နည်းပြချုပ် ဖေဘီယာနိုဟိုဆေးကော်စတာက မှတ်ချက်ပြု ပြောကြားခဲ့သည်။

“ကျွန်တော်တို့ ဒီပွဲမှာ အနိုင် ၃ မှတ် ရယူနိုင်ခဲ့ပေမယ့် လွယ်လွယ်ကူကူ ရခဲ့တာတော့ မဟုတ်ပါဘူး။ ဒီရလဒ်ဟာ ရာသီကြို ကာလမှာ ပြင်းပြင်းထန်ထန် ပြင်ဆင် လေ့ကျင့်ခဲ့ကြလို့ ရခဲ့တဲ့ ရလဒ်ပါ။ ကျွန်တော့် ကစားသမားတွေဟာ လေ့ကျင့်ရေး ကွင်းမှာရော ပြိုင်ပွဲကွင်းထဲ မှာပါ အစွမ်းကုန် ကျိုးစားခဲ့ကြ တာကြောင့် ဒီရလဒ်က ထိုက်တန်တဲ့ ရလဒ်ပါ”ဟု ဖေဘီယာနိုက မှတ်ချက်ပေးခဲ့သည်။ ယင်းသို့ ပြောကြားခဲ့သော်လည်း အသင်း၏ ကစားပုံ၌ အားနည်းချက်များ ရှိနေသေးသည်ကို ဖေဘီယာနိုက လက်ခံပြီး ဇေယျာရွှေမြေ အသင်းမှာ တစ်ပွဲချင်း တိုးတက်လာမည် ဖြစ်ကြောင်း ဆိုသည်။

ဆက်လက်၍ ဖေဘီယာနိုက ယခုမှ ပွဲစဉ်တစ်ပွဲသာ ကစားရသေးသောကြောင့် ရာသီကုန် အနေအထားကို မခန့်မှန်းနိုင်ကြောင်း၊ အသင်းအုပ်ချုပ်ရေး အဖွဲ့မှ ချန်ပီယံ ဖြစ်ရန် ဖိအားပေးထားခြင်း မရှိကြောင်း၊ မိမိအာမခံနိုင်သည်မှာ ဇေယျာရွှေမြေ အနေဖြင့် ချန်ပီယံဆုကို ရယူနိုင်ရန် မလွယ်သေးသော်လည်း ပြိုင်ဘက်များ အနေဖြင့် ဇေယျာရွှေမြေကို အနိုင်ယူရန် ခက်ခဲစေမည် ဖြစ်ကြောင်း ပြောကြားခဲ့သည်။

ဇေယျာရွှေမြေ အသင်းသည် ယခုရာသီတွင် နိုင်ငံခြားသား ကစားသမား ၃ ဦးသာ ခေါ်ယူထားရာ ပြိုင်ဘက် အသင်းကြီးများနှင့် ယှဉ်ပါက တစ်ပန်းရှုံးနေသည်။ သို့ဖြစ်ရာ ဖေဘီယာနိုက နိုင်ငံခြား ကစားသမားတစ်ဦး ထပ်မံလိုချင် သေးသော်လည်း အသင်း၏ အခြေအနေကို နားလည်ကြောင်း၊ ရှိသည့် လူစာရင်းနှင့် အကောင်းဆုံး ရလဒ် ရရှိစေရန် ဆောင်ရွက်သွားမည် ဖြစ်ကြောင်း ဖွင့်ဟခဲ့သည်။

ဖေဘီယာနိုသည် မူလက ဇေယျာရွှေမြေ အသင်း၏ ကြံ့ခိုင်ရေး နည်းပြ ဖြစ်ပြီး ပြီးခဲ့သည့် ရာသီအကုန်တွင် နည်းပြချုပ် စတီဖန်ဟန်ဆန် ထွက်ခွာသွားပြီးနောက် နည်းပြချုပ်အဖြစ် ပြောင်းလဲ တာဝန်ပေးအပ်ခြင်း ခံရသူ ဖြစ်သည်။ ဖေဘီယာနိုသည် သူ၏ အသင်းကို လူငယ်များဖြင့် အားပြုတည်ဆောက်ထားပြီး အသင်းမှာ အကောင်းဆုံး ပုံစံ ရရှိခြင်း မရှိသေးသော်လည်း အဖွင့်ပွဲတွင် Horizon ကို အနိုင်ယူကာ အနိုင် ၃ မှတ်ကို အရယူနိုင်ခဲ့သည်။