AYA Bank Cup 2016 ပြိုင်ပွဲ၊ မလေးရှား အသင်းနှင့် ခြေစမ်းပွဲများ ကစားရန်အတွက် ပြင်ဆင်လေ့ကျင့်မည့် မြန်မာ့လက်ရွေးစင် အသင်းသည် အသင်း၏ ပဏာမ လူစာရင်းတွင် ကစားသမား တစ်ဦးကို ထပ်မံပေါင်းထည့် လိုက်သည်။ သို့ဖြစ်ရာ လက်ရှိတွင် ပဏာမ မြန်မာ့လက်ရွေးစင် အသင်း၌ ကစားသမား ၂၇ ဦးထိ ရှိလာပြီ ဖြစ်သည်။

ထပ်မံ ခေါ်ယူလိုက်သည့် ကစားသမားမှာ ဇွဲကပင်အသင်း၏ အဓိက ကစားသမား တစ်ဦးဖြစ်သည့် လူငယ် ကွင်းလယ်လူ ဇင်ဖြိုးအောင် ဖြစ်သည်။ ဇင်ဖြိုးအောင်သည် ပြီးခဲ့သည့် ၂၀၁၅ ခုနှစ်က အာရှ ယူ-၁၉ ချန်ပီယံရှစ်နှင့် အာဆီယံ ယူ-၁၉ ချန်ပီယံရှစ်တို့ကို ဝင်ရောက် ယှဉ်ပြိုင်ခဲ့သည့် မြန်မာ ယူ-၁၉ အသင်း၏ အဓိက ကစားသမား တစ်ဦးဖြစ်ပြီး အာဆီယံ ယူ-၁၉ ချန်ပီယံရှစ်တွင် မြန်မာအသင်းကို အသင်းခေါင်းဆောင် အဖြစ် ဦးဆောင်ခဲ့သူ ဖြစ်သည်။

မြန်မာ့ လက်ရွေးစင် အသင်းကို မြန်မာနေရှင်နယ်လိဂ် ပွဲစဉ် ၁၂ အပြီး မေ ၂၃ တွင် စတင် စုစည်းမည် ဖြစ်ကာ မေလ ၂၈ တွင် ကစားမည့် မလေးရှား အသင်းနှင့် ခြေစမ်းပွဲ၊ ဇွန်လဆန်းတွင် ယှဉ်ပြိုင်ကြမည့် AYA Bank Cup 2016 ပြိုင်ပွဲများ အထိ ဆက်လက် စုစည်း လေ့ကျင့်သွားမည် ဖြစ်သည်။