အာရှဖလား အုပ်စု(ဂ) အဖွင့်ပွဲစဉ်အဖြစ် မြန်မာအသင်းနှင့် ဂျပန်အသင်းတို့ ဇန်နဝါရီ ၂၁ ရက် ဒေသစံတော်ချိန် နေ့လယ် ၁နာရီ ၃၀မိနစ် အိန္ဒိယနိုင်ငံ Pune မြို့တွင် ယှဉ်ပြိုင်ခဲ့ကြရာ ဂျပန်အသင်းက (၅-၀)ဂိုးဖြင့် အနိုင်ရရှိခဲ့သည်။ ဂျပန်အသင်းသည် ကမ္ဘာအဆင့်(လက်ရှိအချိန်အထိ) အဆင့် ၁၃ ရှိသော အသင်းဖြစ်ပြီး အင်အားကြီးအသင်း တစ်သင်းပီပီ ကမ္ဘာ့အဆင့် ၄၇ ရှိ မြန်မာအသင်းကို ပွဲချိန်ပြည့်နီးပါး အသာစီးမှ ကစားသွားနိုင်ခဲ့သည်။

လက်ရှိအာရှဖလားချန်ပီယံ အသင်းနှင့် ယှဉ်ပြိုင်ရမည့် အဖွင့်ပွဲစဉ်အတွက် မြန်မာအသင်းအနေဖြင့် မေဇင်နွယ်၊ခင်သန်းဝေ၊ချစ်ချစ်၊အေးအေးမိုး၊ဖြူဖြူဝင်း၊ ခင်မာလာထွန်း၊ ခင်မိုမိုထွန်း၊ သင်းသင်းယု၊ ဂျူလိုင်ကျော်၊နုနု၊စန်းသော်သော်တို့ဖြင့်ပွဲထွက်လာခဲ့သည်။

ပထမပိုင်းတွင် မြန်မာအသင်း ခံစစ်ကစားပုံကောင်းခဲ့ပြီး ဂိုးသမား မေဇင်နွယ် လက်စွမ်းပြ မှုများကြောင့် ဂျပန်အသင်းက (၁-၀)ဂိုးဖြင့်သာ ဦးဆောင်နိုင်ခဲ့သည်။ ဒုတိယပိုင်းတွင် မြန်မာအသင်း ကစားအားကျဆင်းခဲ့ပြီး ဂျပန်အသင်းမှ လူစားဝင်ကစားသမားများ ခြေစွမ်းပြ ဂိုးများသွင်းယူနိုင်ခဲ့ခြင်းကြောင့် ပွဲပြီးဆုံးချိန်တွင် မြန်မာအသင်း (၅-၀)ဂိုးဖြင့် ရှုံးနိမ့်ခဲ့သည်။

မြန်မာ့လက်ရွေးစင် အမျိုးသမီးအသင်းသည် ဒုတိယပွဲစဉ်အဖြစ် တောင်ကိုရီးယားအသင်းနှင့် ဇန်နဝါရီ ၂၄ရက်တွင် ယှဉ်ပြိုင်ရမည်ဖြစ်သည်။

ယနေ့ပွဲစဉ်တွင် မြန်မာ့လက်ရွေးစင် အမျိုးသမီးတိုက်စစ်မှူး ဝင်းသိင်္ဂီထွန်း၊ နည်းပြချုပ် ဦးတင်မြင့်အောင်၊ လက်ထောက်နည်းပြ ဦးခင်မောင်ထွေးတို့ Covid-19 ရောဂါကူးစက်ခံခဲ့ရသည့်အတွက် ပါဝင်နိုင်ခြင်းမရှိခဲပေ။