၂၀၂၂ အာဆီယံအမျိုးသမီးချန်ပီယံရှစ် တတိယနေရာလုပွဲအဖြစ် ဇူလိုင်လ ၁၇ရက်နေ့ မြန်မာစံတော်ချိန် နေ့လယ်၂နာရီ ၃၀မိနစ် ဖိလစ်ပိုင်နိုင်ငံ၊ Rizal Memorial ကွင်းတွင် ယှဉ်ပြိုင်ခဲ့ကြသည့် မြန်မာအသင်းနှင့် ဗီယက်နမ်အသင်းတို့ ပွဲစဉ်တွင် မြန်မာအသင်းက (၄-၃)ဂိုး ဖြင့် အနိုင်ရကာ တတိယဆု ရရှိခဲ့သည်။

မြန်မာအသင်းအတွက် ပွဲထွက်လူစာရင်းတွင် အသင်းခေါင်းဆောင် ခင်မာလာထွန်း၊ ဂိုးသမားမေဇင်နွယ်နှင့် နောက်ခံလူများအဖြစ် ချစ်ချစ်၊ခင်သန်းဝေ၊အေးအေးမိုး၊နန့်ဇူဇူးထက်၊ ကွင်းလယ်ကစားသမားများအဖြစ် နော်ထက်ထက်ဝေ၊ ပုံပုံပြည့်မောင်၊ စန်းသော်သော်၊တိုက်စစ်မှူးများအဖြစ် ဝင်းသိင်္ဂီထွန်း၊ ဂျူလိုင်ကျော်တို့ကို ထည့်သွင်းပြီး ၄-၄-၂ ကစားကွက်ဖြင့် ဗီယက်နမ်အသင်းကို ရင်ဆိုင်ခဲ့သည်။

တတိယလုပွဲဖြစ်သောကြောင့် ပြိုင်ဆိုင်မှုပြင်းထန်ခဲ့ပြီး ပထမပိုင်း ( ၉ )မိနစ်တွင် မြန်မာအသင်းအတွက် အဖွင့်ဂိုးကို စန်းသော်သော်မှ သွင်းယူခဲ့ပြီး ဦးဆောင်ဂိုး ရရှိခဲ့သည်။ ဗီယက်နမ်အသင်းသည် ဂိုးပေးလိုက်ရပြီးနောက် တိုက်စစ်မြှင့်တင်ကစားခဲ့ပြီး ချေပဂိုး ကို ပွဲချိန် (၂၃) မိ နစ်တွင် အသင်းခေါင်းဆောင် တိုက်စစ်မှူး Huynh Nhu မှ သွင်းယူခဲ့သည်။ ယင်းနောက် ဗီယက်နမ်အသင်းအတွက် ဒုတိယဂိုးကို Huynh Nhu မှ ထပ်မံသွင်းယူကာ ပထမပိုင်းပြီးဆုံးချိန်တွင် ဗီယက်နမ်အသင်းက မြန်မာအသင်းကို (၂-၁ ဂိုး)ဖြင့် ဦးဆောင်ကစားခဲ့သည်။

ဒုတိယပိုင်း ပြန်လည်စတင်ချိန်တွင် မြန်မာအသင်းက ဗီယက်နမ်အသင်းဘက်ကို ဖိအားပေးကစားခဲ့ပြီး ပွဲချိန်( ၅၆)မိနစ်တွင် ချေပဂိုးကို စန်း သော်သော်မှ သွင်းယူပေးခဲ့ကာ (၂-၂ )ဂိုး သရေဖြစ်ခဲ့သည်။ ယင်းနောက် မြန်မာအသင်းက ဆက်တိုက်ဆိုသလို အနိုင်ဂိုးအတွက် ဖိအားပေးကစားခဲ့ပြီး ပွဲချိန် (၈၀)မိနစ်တွင် မြန်မာအသင်း နောက်တန်းနှင့်ဂိုးသမား နားလည်မှုလွဲသည့် အခြေအနေမှ ဗီယက်နမ်အသင်း တတိယ ဂိုး ရရှိခဲ့သည်။

မြန်မာအသင်းအနေဖြင့် ဦးဆောင်ဂိုးခွင့်ပြုပြီးနောက် ဆက်တိုက်ဆိုသလို တိုက်စစ်ဖွင့်ကစားခဲ့ပြီး ပွဲချိန်(၈၃)မိနစ်တွင် လူစားဝင် ကစား သမား လင်းမြင့်မိုရ်မှ ချေပဂိုးသွင်းယူပေးခဲ့ပြီး အနိုင်ဂိုးကို စန်းသော်သော်မှ ပွဲချိန် (၈၆)မိနစ်တွင် သွင်းယူနိုင်ခဲ့သဖြင့် ပွဲအပြီးတွင် ဗီယက် နမ် အသင်းကို (၄-၃) ဂိုးဖြင့် အနိုင်ရရှိကာ တတိယဆု ရရှိခဲ့သည်။ မြန်မာအသင်းသည် အာဆီယံအမျိုးသမီးချန်ပီယံရှစ်တွင် တတိယနေရာ(၃) ကြိမ်မြောက်ရရှိခြင်းဖြစ်ပြီး ၂၀၁၆နှင့် ၂၀၁၉ တို့တွင်လည်း တတိယနေရာ ရရှိခဲ့ဖူးသည်။

” ဒီနေ့ အနိုင်ရလဒ်အတွက် အရမ်းကိုပျော်ရွှင်ရပါတယ်။ ဒီနေ့ပွဲအတွက် အကောင်းဆုံးကစားသမားဆုနဲ့ ဟက်ထရစ်သွင်းဂိုးရခဲ့လို့ ပိုပြီးပျော်ရွှင်ရပါတယ်။ ကျွန်တော်တို့အသင်း အခုလို စည်းစည်းလုံးလုံးနဲ့ အနိုင်မခံ အရှုံးမပေးခဲ့လို့သာ အခုလို တတိယနေရာကို ရရှိခဲ့တာပါ။နည်းပြတွေရဲ့ သွန်သင်မှု ကျွန်တော့်အသင်းဖော်တွေမရှိဘဲ ဒီလို ဟက်ထရစ်သွင်းဖို့ဆိုတာ မဖြစ်နိုင်ပါဘူး။ ကစားဖော်တွေကို ဒီနေ့နိုင်ပွဲအတွက် ဂုဏ်ယူသလို အရမ်းလည်းကျေးဇူးတင်ပါတယ်” ဟု စန်းသော်သော်က ပွဲအပြီး သတင်းစာရှင်းလင်းပွဲတွင် ပြောကြားခဲ့သည်။

‌”ကစားသမားတွေရဲ့ နိုင်လိုစိတ်၊ အသင်းလိုက်စည်းလုံး ညီညွတ်မှုတွေကြောင့် ဒီနေ့ နိုင်ပွဲဖြစ်လာခဲ့တာပါ။ အဓိကအားဖြင့် ကစားသမားတွေ တစ်ဦးချင်းအလိုက် အရင်ပွဲ‌တွေက အမှားတွေကိုပြန်လည်သင်ယူပြီး ကိုယ်တိုင်ပြန်လည်တည်ဆောက်နိုင်ခဲ့လို့ ဒီလိုရလဒ်ထွက်တာပါ။ ကစားသမားတွေကို ချီးကျူးပါတယ်။ မြန်မာအမျိုးသမီးဘောလုံးလောက တိုးတက်ဖို့ ကျွန်တော်တို့အများကြီးဆက်လက်လုပ်ဆောင်ရဦးမှာပါ။ ကစားသမားတွေပိုပြီး ပရိုဆန်လာဖို့ ကျွန်တော်တို့ ပိုပြီးကြိုးစားရပါမယ်။ နိုင်ငံတကာထွက်ကစားနိုင်တဲ့ ကစားသမားတွေ များများ ရှိဖို့လည်း ဝိုင်းပြီးလုပ်ဆောင်ရပါမယ်” ဟု မြန်မာ့လက်ရွေးစင်အမျိုးသမီးအသင်း နည်းပြချုပ် ဒေါ်သက်သက်ဝင်းက ပွဲအပြီး သတင်းစာရှင်းလင်းပွဲတွင် ပြောကြားခဲ့သည်။

အခြားပွဲစဉ်ဖြစ်သည့် အိမ်ရှင် ဖိလစ်ပိုင်နှင့် ထိုင်းအသင်းတို့ ဗိုလ်လုပွဲစဉ်တွင် ဖိလစ်ပိုင်အသင်းက (၃-၀) ဂိုးဖြင့် အနိုင်ရပြီး အာဆီယံအမျိုးသမီးချန်ပီယံရှစ်ပြိုင်ပွဲတွင် ပထမဆုံး ဗိုလ်စွဲနိုင်သည့် မှတ်တမ်းတင်နိုင်ခဲ့သည်။

Gallery