၂၀၂၃ ဆီးဂိမ်းစ် အမျိုးသား ဘောလုံး အကြို ဗိုလ်လုပွဲစဉ်အား ယနေ့ ဒေသစံတော်ချိန် ည(၈)နာရီက ဖနွမ်းပင်မြို့ အိုလံပစ်ကွင်းတွင် ကျင်းပခဲ့ရာ မြန်မာယူ၂၂ အသင်းက ထိုင်း ယူ၂၂ အသင်းအား (၃-၀)ဂိုးဖြင့် အရေးနိမ့်ခဲ့သည်။ မြန်မာအသင်းတွင် နည်းပြချုပ် မိုက်ကယ် ပွဲပယ်ခံထားရသည့် အတွက် လက်ထောက် နည်းပြ ဦးဇော်ဝင်းထွန်းက ယာယီနည်းပြချုပ် အဖြစ်တာဝန်ယူ ဆောင်ရွက်ခဲ့သည်။ အလားတူ ဖိလစ်ပိုင်နှင့် ပွဲစဉ်တွင် ၂ ဝါ ၁ နီ ဖြင့်ထုတ်ပယ်ခံထားရသည့် နောက်ခံလူ လာဘ်ဝေဘုန်း နေရာတွင် နောင်နောင်စိုးအား အသုံးပြုသွားခဲ့သည်။

ပွဲချိန် ပထမပိုင်းတွင် ထိုင်းအသင်း ဘောလုံးပိုင်ဆိုင်မှု အသာဖြင့် မြန်မာအသင်းအား စိုးမိုးထားနိုင်ခဲ့ပြီး ပွဲချိန် ၃၇ မိနစ်တွင် ပြစ်ဒဏ်ဘောမှ ရရှိသည့် တီရာဆတ်၏ ခေါင်းတိုက်ဂိုးဖြင့် ထိုင်းအသင်း ဗွေဆော်ဦးဂိုး ရရှိခဲ့သည်။ မြန်မာအသင်း အနေဖြင့် ထိုင်းအသင်း ဂိုးဧရိယာအတွင်း အပိုင်ကန်သွင်းခွင့်များ ရရှိခဲ့သော်လည်း ဂိုးကံခေခဲ့သဖြင့် ပထမပိုင်းတွင် (၁-၀)ဂိုးဖြင့် အရေးနိမ့်နေခဲ့သည်။ ဒုတိယပိုင်း ပြန်လည်စတင်ရာတွင် ချေပဂိုး ရရှိရေး အတွက် မြန်မာအသင်း တချိန်လုံး ဖိအားပေး ကစားနိုင်ခဲ့သော်လည်း ဂိုးမရရှိခဲ့ဘဲ ထိုင်းအသင်းက တန်ပြန်တိုက်စစ်မှ ပွဲချိန် ၈၅၊ ၉၇ တို့တွင် ဂျိမ်းစ်နှင့် အာနန်တို့ သွင်းဂိုးများဖြင့် ထပ်မံဂိုးရရှိခဲ့သည်။

“အရင်ဆုံး ထိုင်းအသင်း နိုင်ပွဲအတွက် ဂုဏ်ပြုပါတယ်။ ကျွန်တော်တို့ ဆီမီးဖိုင်နယ်ပွဲ အတွက် သေသေချာချာ ပြင်ဆင်ခဲ့သလို ကြိုးစားပြီး ကစားသွားကြတဲ့ ကစားသမားတွေ အားလုံးကိုလည်း အသိအမှတ်ပြုပါတယ်။ ဒိုင်လူကြီးဆုံးဖြတ်ချက် နဲ့ပတ်သက်လို့ ကျွန်တော်တို့က ပွဲကစားချိန် အတွင်းမှာ ဒိုင်ရဲ့ဆုံးဖြတ်ချက်ကို လေးစားရပါမယ်။ မှန်တာ၊ မှားတာ ကျွန်တော်တို့ ပြောစရာမရှိပါဘူး။ သူ့အလုပ်ပဲဖြစ်ပါတယ်။ ထိုင်း၊ ဗီယက်နမ်၊ အင်ဒိုနီးရှား ပရိသတ်တွေလို ကွင်းထဲထိ လာအားမပေးနိုင်ပေမဲ့ ဒီက မြန်မာပရိသတ်တွေကိုရော ရုပ်သံနဲ့ဆိုရှယ်မီဒီယာ တိုက်ရိုက်ထုတ်လွှင့်မှုကနေ ဒီနေ့ပွဲအထိ တောက်လျှောက်အားပေးခဲ့ကြတဲ့ မြန်မာပရိသတ် အားလုံးကို ဒီနေရာကနေ ကျေးဇူးတင်ပါကြောင်း ပြောကြားလိုပါတယ်။ ဗီယက်နမ်နဲ့ တတိယနေရာ လုပွဲမှာလည်း ဆုတံဆိပ် ရရှိအောင် ကျွန်တော်တို့ ပြန်လည် စုစည်းလေ့ကျင့်ပြီး ပြင်ဆင်သွားပါမယ်။ ကျွန်တော်တို့ အနေနဲ့ ကစားသမား အားလုံးအပေါ်ကို ယုံကြည်မှု ရှိထားပါတယ်။” ဟု လက်ထောက်နည်းပြ ဦးဇော်ဝင်းထွန်းက မီဒီယာများ၏ မေးမြန်းမှုကို ဖြေကြားခဲ့သည်။

မြန်မာ ယူ၂၂ အသင်းသည် တတိယ နေရာလုပွဲအဖြစ် ဗီယက်နမ် အသင်းနှင့် လာမည့် မေလ ၁၆ ရက်နေ့၊ ဒေသစံတော်ချိန် ညနေ(၄း၀၀)နာရီ၊ အိုလံပစ်ကွင်းတွင် ဆက်လက်ယှဉ်ပြိုင်ရမည် ဖြစ်သည်။