ဗီယက်နမ် နိုင်ငံက အိမ်ရှင်အဖြစ် လက်ခံ ကျင်းပနေသည့် (၃၁)ကြိမ်မြောက် အရှေ့တောင်အာရှ အားကစား ပွဲတော် (ဆီးဂိမ်းစ်) အမျိုးသမီး ဘောလုံး ပြိုင်ပွဲတွင် မြန်မာ့ လက်ရွေးစင် အမျိုးသမီး အသင်းသည် အုပ်စု နောက်ဆုံး ပွဲစဉ်တွင် စင်ကာပူ အသင်းအား (၁-၀)ဂိုးဖြင့် အနိုင်ရရှိခဲ့သဖြင့် ဆီမီးဖိုင်နယ် အဆင့်သို့ တက်ရောက်သွားခဲ့ပြီ ဖြစ်သည်။

အကြိုဗိုလ်လုပွဲသို့ တက်ရောက်သွားခဲ့သည့် မြန်မာ့လက်ရွေးစင် အမျိုးသမီး အသင်းအား မြန်မာနိုင်ငံ အိုလံပစ်ကော်မတီ ဥက္ကဋ္ဌ အားကစား နှင့် လူငယ်ရေးရာ ဝန်ကြီးဌာန ပြည်ထောင်စု ဝန်ကြီး ဦးမင်းသိန်းဇံနှင့် ဝန်ကြီးဌာန တာဝန်ရှိသူများက အသင်းတည်းခိုရာ ဟိုတယ်သို့ လာရောက်တွေ့ဆုံ အားပေးခဲ့ပြီး နိုင်ငံတော်က ထပ်ဆောင်းချီးမြှင့်သည့် အမေရိကန် ဒေါ်လာ (၁)သိန်းကို မြန်မာ့ လက်ရွေးစင် အမျိုးသမီး အသင်းအား ပေးအပ်ချီးမြင့်ခဲ့သည်။ ပြည်ထောင်စုဝန်ကြီးသည် မြန်မာ့ လက်ရွေးစင် အမျိုးသမီး ဘောလုံး အသင်းနှင့်အတူ ဆီးဂိမ်းစ် ပြိုင်ပွဲဝင် မြန်မာ့ လက်ရွေးစင် အမျိုးသား ဘောလီဘော အသင်းကိုလည်း အတူတကွ တွေ့ဆုံခဲ့ခြင်း ဖြစ်ပြီး အသင်းများ နိုင်ငံ့ဂုဏ်‌ ဆောင်နိုင်ရေးအတွက် အစွမ်းကုန် ကြိုးစားယှဉ်ပြိုင်ရန် တိုက်တွန်း အားပေးစကား ပြောကြားခဲ့သည်။

မြန်မာ အမျိုးသမီး အသင်းသည် အုပ်စု(ခ)တွင် ထိုင်း၊ လာအို၊ စင်ကာပူ အသင်းတို့နှင့် ရင်ဆိုင်ခဲ့ရကာ ၂ ပွဲနိုင်၊ ၁ ပွဲ သရေ ရမှတ် ၇ မှတ်ဖြင့် အကြိုဗိုလ်လုပွဲ (ဆီမီးဖိုင်နယ်)သို့ တက်ရောက်နိုင်ခဲ့ခြင်း ဖြစ်သည်။ မြန်မာ အမျိုးသမီးအသင်းသည် အကြိုဗိုလ်လုပွဲစဉ် အဖြစ် လာမည့် မေလ ၁၈ ရက်နေ့ မြန်မာစံတော်ချိန် ညနေ ၆း၃၀ နာရီတွင် အိမ်ရှင် ဗီယက်နမ် အမျိုးသမီး အသင်းနှင့် ယှဉ်ပြိုင်ရမည် ဖြစ်သည်။ ယခုနှစ် ဆီးဂိမ်းစ် ပြိုင်ပွဲသို့ မြန်မာ့လက်ရွေးစင် ယူ၂၃ အသင်း၊ အမျိုးသမီး လက်ရွေးစင်အသင်း၊ အမျိုးသမီး ဖူဆယ်လက်ရွေးစင် အသင်း၊ အမျိုးသား ဖူဆယ် လက်ရွေးစင် အသင်း စုစုပေါင်း အသင်း(၄)သင်း ပါဝင် ယှဉ်ပြိုင်နေပြီး အသင်းများ အောင်နိုင်ရေးနှင့် စီမံခန့်ခွဲရေး လုပ်ငန်းများ အတွက် မြန်မာနိုင်ငံ ဘောလုံးအဖွဲ့ချုပ် အထွေထွေ အတွင်းရေးမှူး ဦးကိုကိုသိန်းနှင့်အဖွဲ့က ပြိုင်ပွဲကျင်းပရာ နေရာများတွင် သက်ဆိုင်ရာ ဝန်ကြီးဌာန တာဝန်ရှိသူများနှင့် ပူးပေါင်းဆောင်ရွက်လျက်ရှိသည်။