အဓိကဆွေးနွေးချက်များ-
✅ အမျိုးသမီး အကယ်ဒမီ တည်ဆောက်ပြီးစီးမှုနှင့် ကစားသမား ရွေးချယ်ရေး လုပ်ငန်းများ
✅ FIFA Arena နှင့် FIFA Football For Schools
✅ လက်ရွေးစင်အသင်းများ
✅ Grassroots နှင့် လူငယ်ဘောလုံး
✅ နည်းစနစ်ဆိုင်ရာ စီမံချက်များ (Technical Development)
✅ အမျိုးသမီးဘောလုံး (Women’s Football Development)
✅ မန္တလေး အကယ်ဒမီ ပြန်လည်တည်ဆောက်ခြင်း
✅ ဒိုင်လုပ်ငန်း (Referee Development)
✅ လူငယ်ပြိုင်ပွဲများ(Youth Competition)
✅ Financial Reports

မြန်မာနိုင်ငံဘောလုံးအဖွဲ့ချုပ်၏ ၂၀၂၆ ခုနှစ်၊ ပထမအကြိမ်မြောက် အလုပ်အမှုဆောင်ကော်မတီ (MFF Executive Committee Meeting 1/2026) အစည်းအဝေးကို ဧပြီလ ၅ ရက်၊ မွန်းလွဲ ၁:၀၀ နာရီက ရန်ကုန်မြို့ရှိ Novotel Yangon Max Hotel တွင် ကျင်းပပြုလုပ်ခဲ့သည်။

အစည်းအဝေးသို့ မြန်မာနိုင်ငံဘောလုံးအဖွဲ့ချုပ် ဥက္ကဋ္ဌ ဦးဇော်ဇော်၊ ဒုတိယဥက္ကဋ္ဌများ ဖြစ်ကြသည့် ဦးထိပ်ခွန်နောင်မြင့်ဝေ နှင့် ဒေါက်တာခင်စောဦး၊အလုပ်အမှုဆောင်ကော်မတီဝင်များ၊ အားကစားနှင့် လူငယ်ရေးရာဝန်ကြီးဌာနနှင့် ပညာရေးဝန်ကြီးဌာနတို့မှ တာဝန်ရှိသူများ တက်ရောက်ခဲ့ကြသည်။

အစည်းအဝေးအစီအစဉ်အရ ရှေးဦးစွာ (၂၃.၃.၂၀၂၆) ရက်နေ့တွင် ကွယ်လွန်သွားခဲ့သော မြန်မာ့လက်ရွေးစင်ကစားသမားဟောင်း၊ လက်ရွေးစင်အသင်းနည်းပြချုပ်ဟောင်း၊ တွဲဖက်အထွေထွေအတွင်းရေးမှူးဟောင်းနှင့် နည်းစနစ်ကော်မတီဥက္ကဋ္ဌ ဖြစ်သူ ဦးတင်မြင့်အောင် အတွက် တစ်မိနစ်ငြိမ်သက်ကာ ဂုဏ်ပြုဆုတောင်းခြင်း အစီအစဉ်ကို ပြုလုပ်ခဲ့သည်။

ထို့နောက် အဖွဲ့ချုပ်ဥက္ကဋ္ဌ ဦးဇော်ဇော်က အဖွင့်အမှာစကား ပြောကြားခဲ့ပြီး တက်ရောက်လာသည့် အလုပ်အမှုဆောင်ကော်မတီဝင် အမည်စာရင်းများအား အတည်ပြုကြေညာခဲ့သည်။

ဆက်လက်၍ ၂၀၂၆ ခုနှစ် ၃လတာ အတွင်း ဆောင်ရွက်ခဲ့သည့် ဘောလုံးလှုပ်ရှားမှုများကို Video Clip ဖြင့် ပြသခဲ့ပြီး ၂၀၂၅ ခုနှစ်၊ နိုဝင်ဘာလ (၂၇) ရက်နေ့က ကျင်းပခဲ့သည့် အလုပ်အမှုဆောင်ကော်မတီ အစည်းအဝေးမှတ်တမ်းကို အတည်ပြုခဲ့သည်။
ဘဏ္ဍာရေးဆိုင်ရာ ကိစ္စရပ်များနှင့် ပတ်သက်၍ ၂၀၂၆ ခုနှစ် ဘဏ္ဍာရေးနှစ်အတွက် ရ/သုံး ခန့်မှန်းခြေစာရင်းများကို ရှင်းလင်းတင်ပြခဲ့သည်။ ထို့ပြင် အဖွဲ့ချုပ်၏ အဓိကစီမံကိန်းများဖြစ်သော FIFA Arena Project တည်ဆောက်ခြင်း၊ မန္တလေးမြို့ရှိ အမျိုးသမီးဘောလုံးအကယ်ဒမီ ပြီးစီးမှုအခြေအနေနှင့် ဖွင့်လှစ်နိုင်မည့် ခန့်မှန်းကာလများကိုလည်း အသေးစိတ် ဆွေးနွေးခဲ့ကြသည်။

အခြေခံဘောလုံးကဏ္ဍနှင့် ပတ်သက်၍ Grassroots Activities နှင့် Football for Schools Program များ အောင်မြင်စွာ ကျင်းပပြီးစီးမှု၊ ၂၀၂၆ ခုနှစ်အတွင်း အသက် (၁၅) နှစ်အောက် လူငယ်ဘောလုံးလိဂ်ပြိုင်ပွဲများ ကျင်းပမည့် အစီအစဉ်၊ အသက် (၁၆) နှစ်အောက် ဘောလုံးကစားသမားများ ရွေးချယ်ခြင်း၊ ဒေသတွင်းလေ့ကျင့်ရေးစင်တာ (RTC) များ၏ အခြေအနေနှင့် မန္တလေးဘောလုံးအကယ်ဒမီ ပြန်လည်ပြုပြင်ခြင်းဆိုင်ရာများ၊ မြန်မာ့လက်ရွေးစင်အသင်းများ၏ လှုပ်ရှားမှုများနှင့် ရှေ့ဆက်ဆောင်ရွက်သွားမည့် လုပ်ငန်းစဉ်များ၊ ဒိုင်လူကြီးကောင်းများ မွေးထုတ်နိုင်ရေး ဆောင်ရွက်သွားမည့် အစီအစဉ်များ၊ အမျိုးသမီးဘောလုံး ဖွံ့ဖြိုးတိုးတက်ရေးအတွက် လုပ်ဆောင်သွားမည့် အခြေအနေများအား ရှင်းလင်းတင်ပြခဲ့ပြီး အထွေထွေဆွေးနွေးမှု ပြုလုပ်ခဲ့သည်။

အစည်းအဝေးအပြီးတွင် အဖွဲ့ချုပ်ဥက္ကဋ္ဌ ဦးဇော်ဇော်က နိဂုံးချုပ်အမှာစကား ပြောကြားခဲ့ပြီး စုပေါင်းဓာတ်ပုံရိုက်ကူးကာ ၂၀၂၆ ခုနှစ်၊ ပထမအကြိမ်မြောက် အလုပ်အမှုဆောင်ကော်မတီ အစည်းအဝေးကို အောင်မြင်စွာ ရုပ်သိမ်းခဲ့သည်။